Ulytaý oblysynda apatty úılerdi súrý bastaldy
JEZQAZǴAN. KAZINFORM — Jezqazǵan qalasynda renovatsııa baǵdarlamasyn iske asyrý sheńberinde Abaı kóshesi № 53, 55, 57, 59 mekenjaılarynda ornalasqan apatty turǵyn úılerdi súrý jumystary qarqyn aldy.
Ulytaý oblysy ákimdiginiń baspasóz qyzmetiniń habarlaýynsha, jumystar kezeń-kezeńimen júzege asyrylyp jatyr. Atap aıtqanda, birinshi kezeńde Abaı kóshesindegi № 57 turǵyn úı súriledi. Kelesi kezeńde qajetti daıyndyq jáne uıymdastyrý jumystary aıaqtalǵannan keıin № 59 turǵyn úıdi buzý josparlanyp otyr.
Demontaj barysynda shyǵarylǵan qurylys qaldyqtary men qoqystar arnaıy tehnıka arqyly qalalyq qatty turmystyq qaldyqtar polıgonyna tasymaldanyp, belgilengen talaptarǵa sáıkes ornalastyrylatyn bolady.
Atalǵan joba qalanyń turǵyn úı qoryn jańǵyrtýǵa, turǵyndardyń qaýipsizdigin arttyrýǵa jáne zamanaýı turǵyn úı ınfraqurylymyn damytýǵa baǵyttalǵan.
Aıta keteıik, bul tórt turǵyn úıdiń ornyna eki bloktan turatyn jańa kópqabatty turǵyn úı salý josparlanyp otyr.
