Ulytaý oblysynda alıment tólemeı júrgen boryshkerler jaýapqa tartyldy

ASTANA. KAZINFORM -  Ulytaý oblysynyń prokýratýrasy sot oryndaýshylary alıment pen memleket paıdasyna bereshekterdi óndirýge baǵyttalǵan barlyq sharalardy qabyldamaıtynyn anyqtady.

Tek prokýrorlardyń aralasýynan keıin alıment boıynsha bereshek 92 mln teńgege, ıaǵnı 259 mln teńgeden 167 mln teńgege tómendetildi.

Alıment tóleýden jaltarǵany úshin prokýrorlar qaskóı boryshkerlerge qatysty Qylmystyq kodekstiń 139-baby boıynsha 7 sotqa deıingi tergep-tekserýdi bastady jáne Ákimshilik quqyq buzýshylyq týraly kodekstiń 669-babymen 6 ákimshilik is qozǵady, onyń ishinde 5 boryshkerge qatysty ákimshilik qamaqqa alý, 1 boryshkerge ákimshilik aıyppul túrindegi jaza qoldanyldy.

Sot oryndaýshylar oryndaýsyz memleket paıdasyna óndiriletin jalpy somasy 194 mln teńgeni quraıtyn atqarýshylyq qujattardy negizsiz keri qaıtarǵan.

Polıtsııa organdarymen ákimshilik aıyppuldardy májbúrli túrde óndirýge atqarýshylyq qujattardy usynbaýynan memleket qazynasyna 46 mln teńge túspegen.

29 aqpanda bul suraqtar Ulytaý oblysynyń Zańdylyqty, quqyqtyq tártipti jáne qylmyskerlikke qarsy kúresti qamtamasyz etý jónindegi úılestirý keńesiniń otyrysynda qaraldy.

Barlyq anyqtalǵan zańdylyqty buzýshylyqtar boıynsha ýákiletti organdarǵa prokýrorlyq qadaǵalaý aktileri engizildi.

Osy sanattaǵy atqarýshylyq is júrgizýler oblys prokýratýrasynyń erekshe baqylaýynda.