Ulytaý oblysynda alıment boıynsha 8 boryshkerge qatysty qylmystyq is qozǵaldy

ASTANA. KAZINFORM – Óńirde jalpy alıment boıynsha bereshegi 43 mln teńge bolatyn 22 boryshker býkmekerlik keńselerdiń saıttarynda tirkelip, aınalymy 10,6 mln teńgege bás tigip, onyń 6,8 mln teńgesin utys retinde qolma-qol alǵandyǵy anyqtaldy. 

Ulytaý oblysynyń prokýratýrasy ýákiletti organdarmen birlesip «Boryshker» jedel-profılaktıkalyq is-sharasyn ótkizdi.

Shara aıasynda boryshkerlerdiń turǵylyqty mekenjaılary aralanyp, atqarý qujattardyń talaptaryn oryndaý qajettiligi týraly habarlama tabystalyp, memleket paıdasyna jáne alıment bereshekterin óteý týraly túsindirme jumystary júrgizildi.

Atalǵan is-sharanyń basty maqsaty jazadan qutylmaý qaǵıdatyn saqtaý, aıyppul men alımentti tóleýden jaltaryp júrgen boryshkerler men izdeýde júrgen avtokólik quraldaryn anyqtaýǵa baǵyttaldy.

Ulytaý oblysy prokýratýrasynyń málimetinshe búgingi kúnge Qylmystyq kodekstiń 139-baby boıynsha 8 boryshkerge qatysty qylmystyq is qozǵaldy, 3 ákimshilik jaýaptylyqqa tartyldy, alıment boıynsha 4,8 mln teńge óndirildi.

— Alımentti tóleý mindettemelerin oryndaýy úshin qajetti sharalar qabyldanyp, 2 boryshkerdiń kóligi arnaıy turaqqa qoıyldy, 5 boryshkerdiń júrgizýshi kýálikteri ýaqytsha toqtatý úshin sotqa joldandy. Sonymen qatar óńirde jalpy alıment boıynsha bereshegi 43 mln teńge bolatyn 22 boryshker býkmekerlik keńselerdiń saıttarynda tirkelip, aınalymy 10,6 mln teńgege bás tigip, onyń 6,8 mln teńgesin utys retinde qolma-qol alǵandyǵy anyqtaldy, — delingen prokýratýra habarlamasynda.

Aıta ketelik Jambyl oblysynda bes balanyń anasy jeti jyl boıy alıment tólemegen.