Ulytaý oblysynda alǵashqy kóterme-taratý ortalyǵynyń qurylysy aıaqtalýǵa jaqyn
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın jumys saparymen Ulytaý oblysyna bardy. Bul týraly Úkimettiń baspasóz qyzmeti habarlady.
Sapar sheńberinde ol agroónerkásip kesheni nysandarynyń qurylysymen tanysyp, óńir sharýalarymen kezdesti.
Kezdesýde aýyl sharýashylyǵynyń qazirgi jaǵdaıy men agrarshylardyń túıtkildi máseleleri qaraldy. Oblys qurylǵaly beri, ınvestorlardyń qatysýymen quny 3 mlrd teńge bolatyn 4 joba júzege asyryldy. Times Agro Holding qatysýymen agroónerkásip klasterin qurýdy jáne Samga Agro-men birlesip, Jezqazǵanda 500 mal basyna arnalǵan taýarly sút fermasyn salýdy qosqanda, jańa ınvestıtsııalyq jobalardy júzege asyrý boıynsha jumys júrgizilip jatyr.
Aýyl sharýashylyǵy vıtse-mınıstri Amanǵalı Berdalın jıynǵa qatysýshylardy 2026 jyly bastalǵan Mal sharýashylyǵyn damytýdyń keshendi jospary sheńberinde jeńildetilgen nesıe berý múmkindigi týraly habardar etti. Vıtse-mınıstr óńirdiń tabıǵı jaǵdaılaryn eskere otyryp, shalǵaıdaǵy mal sharýashylyǵyn damytý úshin jaıylymdyq jerlerdi utymdy ıgerýge basa nazar aýdardy. Osy maqsatta jaıylymdardy sýmen qamtamasyz etý, jyljymaly vagondar satyp alý jáne basqa da ilespe shyǵyndardy qarjylandyrýdy kózdeıtin «Jaılaý» biryńǵaı nesıe ónimi iske qosylady.
Kezdesý barysynda sharýalar birqatar máselele kóterdi. «Keńgir» ShQ basshysy Ardaq Nurjanov óńirde servıstik ortalyqtardyń bolmaýyna baılanysty «QazAgroQarjy» arqyly lızıngke alynǵan aýyl sharýashylyǵy tehnıkasyna kepildikpen qyzmet kórsetýdiń kúrdeliligin atap ótti. Vıtse-premer QAQ-qa kompanııa ókilderiniń jumysyn jergilikti jerde uıymdastyrýdy, al Ónerkásip jáne qurylys mınıstrligine qazaqstandyq avtoóndirýshiler qaýymdastyǵymen birlesip, servıstik ortalyqtardyń ashylýyn pysyqtaýdy jáne Jezqazǵanda suranysqa ıe aýyl sharýashylyǵy tehnıkasynyń bolýyn qamtamasyz etýdi tapsyrdy.
Sondaı-aq egindi kıikten qorǵaý máselesi kóterildi. Bıyl mamandar men tehnıka tarta otyryp, aýyl sharýashylyǵy alqabyn qorǵaý jalǵastyrylatyny atap ótildi. Sonymen qatar saqtandyrý tetigi de qarastyrylýda.
«Samǵa» JShS dırektory Abaı Baıdildá ınfraqurylymdy damytý — sýarý jobalary men taýarly sút fermalary úshin sý men elektr qatyn jetkizý máselesin kóterdi. Aýyl sharýashylyǵy alqabyn sýarý isin damytý úshin qajetti jerasty sý qorynyń jetkiliksiz zerttelýi de atap ótildi. Osyǵan baılanysty ákimdikke Sý resýrstary jáne ırrıgatsııa mınıstrligimen birlesip geologııalyq zertteý júrgizý jáne sý resýrstaryn baǵalaý múmkindigin pysyqtaý tapsyryldy.
Kezdesýdi qorytyndylaı kele, vıtse-premer Ulytaý oblysy jańa óńir retinde alda birqatar júıeli mindetter turǵanyn atap ótti. Úkimet óńirdegi bıznesti jáne aýyl sharýashylyǵyn damytýǵa qoldaý kórsetýdi jalǵastyra bermek.
Premer-mınıstrdiń orynbasary sharýalarmen kezdesýden keıin óńirdiń osy jylǵa jáne 2027-2029 jyldardyń josparly kezeńine arnalǵan bıýdjettik qamtamasyz etý jónindegi keńes ótkizdi. Óńirlik standarttar júıesi (ÓSJ) boıynsha oblystyń artta qalýyn qysqartý sharalaryna erekshe nazar aýdaryldy. Ulytaý oblysy, ÓSJ-ge sáıkes, respýblıka boıynsha bazalyq ınfraqurylymmen meılinshe az qamtylǵan.
Jumys sapary sheńberinde vıtse-premer mal sharýashylyǵy men jemshóp daqyldaryn ósirýge mamandanǵan Kengir AGRO agroónerkásip kesheniniń qurylysymen tanysty. Búgingi tańda nysanda ákimshilik-turmystyq keshen salyndy. Bıyl 500 gektar aýmaqta sýarý júıesin iske qosý josparlanýda. Onyń 150 gektary kartopqa, qalǵany jemshóp daqyldaryna arnalady. Kompanııa jaıylymdyq jerlerdi paıdalanyp, mal sharýashylyǵynyń aýstralııalyq modelin engizýge nıetti. Qazirdiń ózinde 14 aýyldyq okrýgte ІQM ósirý sharýashylyǵy quryldy. Sondaı-aq asyltuqymdy mal satyp alý úshin «Igilik» jáne «Bereke» baǵdarlamalaryna qatysý, 400 basqa arnalǵan taýarly sút fermasyn salý josparlanǵan.
Serik Jumanǵarın «Samadi A Group» JShS-nyń jalpy syıymdylyǵy 15 myń tonna kókónis saqtaý qoımasy bar óńirdegi alǵashqy kóterme-taratý ortalyǵynyń qurylys alańynda boldy. Nysan bıyl kúzde paıdalanýǵa beriledi dep josparlanýda. Sondaı-aq kásiporyn «Báıterek» holdıngi jáne Agrarlyq nesıe korporatsııamen birlesip, óńirde et óńdeý jáne shujyq, konservi ónimin shyǵarý jobasyn ázirlemek.
Aıta ketelik Ulytaý oblysynda renovatsııa baǵdarlamasy qarqyndy túrde bastaý alǵan edi.
