Ulytaý oblysynda áleýmettik nysandardy gazdandyrý jumystary júrip jatyr
JEZQAZǴAN. KAZINFORM - Jezqazǵan qalasynyń Qabanbaı batyr shaǵynaýdanynda boı kótergen 300 oryndyq jańa mektep ortalyqtandyrylǵan gaz jelisine qosyldy.
Bul bastama – óńirde ekologııalyq qaýipsizdikti qamtamasyz etip, áleýmettik nysandardy úzdiksiz jylýmen qamtýǵa baǵyttalǵan júıeli jumystardyń jalǵasy.
Atalǵan sharaǵa Ulytaý oblysynyń ákimi Dastan Ryspekov pen «Qazaqgaz» UK AQ Basqarma tóraǵasy Sanjar Jarkeshov arnaıy qatysty.
Óz sózinde óńir basshysy gazdandyrý isiniń óńir ekologııasy men turǵyndardyń turmys sapasyn arttyrýdaǵy mańyzyna toqtaldy.
— «Gazdandyrý jobasy – ekologııalyq turǵydan óte paıdaly. Ol qorshaǵan ortaǵa keletin zııandy qaldyqtardy azaıtyp qana qoımaı, jylý tapshylyǵyn boldyrmaýǵa múmkindik beredi. Ótken jyly biz Talap aýylyndaǵy mektepti kógildir otynǵa qosyp, qys mezgilin sátti ótkerdik. Búginde oblys ortalyǵyndaǵy ózge de áleýmettik nysandardy kezeń-kezeńimen gaz jelisine qosýdy qolǵa alyp otyrmyz. Sonyń biri – osy jańa bilim oshaǵy», – dedi oblys ákimi Dastan Ryspekov.
Aıta keteıik, qazirgi tańda Jezqazǵan qalasynda 4000 abonentke gaz jelisi tartylyp, onyń 2000-y kógildir otyndy tutynyp otyr. Budan bólek, Keńgir aýylynda, Jáırem kentinde jáne Jańaarqa aýdanynda da gazdandyrý jobalary júzege asyryla bastady.
Aldaǵy ýaqytta Ulytaý oblysynda áleýmettik nysandarmen qatar, jeke turǵyn úılerdi de kezeń-kezeńimen gazdandyrý josparlanyp otyr. Osyǵan baılanysty oblys ákimi men «Qazaqgaz» kompanııasy ókilderiniń qatysýymen arnaıy jıyn ótti. Keńeste gazdandyrý isin odan ári jandandyrý, qosymsha gaz kólemin berý, sondaı-aq onyń óńirdegi shaǵyn jáne orta bıznesti damytýdaǵy róli talqylandy.
Qos tarap yntymaqtastyqta áreket ete otyryp, gazdandyrý jobalaryn turaqty túrde júzege asyrýǵa jáne halyqqa qolaıly jaǵdaı jasaýǵa nıetti ekendikterin atap ótti.