Ulytaý oblysynda «Adal qoǵam: Zań, sana jáne qaýipsizdik» forýmy ótti
JEZQAZǴAN. KAZINFORM - Ulytaý oblysynyń ortalyǵynan shalǵaı ornalasqan Ulytaý aýdanynda «Adal qoǵam: Zań, sana jáne qaýipsizdik» atty forým uıymdastyryldy.
Ulytaý oblysy boıynsha Ekonomıkalyq tergeý departamenti bapasóz qyzmetiniń habarlaýynsha, s-shara aýdan turǵyndary, qonaqtary men jastar arasynda quqyqtyq mádenıetti qalyptastyrý, sybaılas jemqorlyqtyń aldyn alý, qarjylyq qaýipsizdikti arttyrý jáne esirtki qylmysyna qarsy túsindirý jumystaryn kúsheıtýge baǵyttalǵan.
Aqparattyq-aǵartýshylyq formatta ótken is-sharaǵa aýdan turǵyndary, jastar, memlekettik organdardyń jáne buqaralyq aqparat quraldarynyń ókilderi qatysty.
Forým barysynda qatysýshylarǵa ınternet-alaıaqtyqtyń aldyn alý joldary, dropperlik shemalardyń qaýiptiligi, tsıfrlyq qaýipsizdik erejeleri, sondaı-aq esirtki qylmysynyń qoǵamǵa tıgizetin zardaptary týraly jan-jaqty aqparat berildi.
Sonymen qatar jastar arasynda zańǵa qurmet qalyptastyrý, quqyqtyq saýattylyqty arttyrý jáne salaýatty ómir saltyn nasıhattaý máseleleri keńinen talqylandy. Mamandar qoǵamdaǵy qaýipsizdik pen tártipti saqtaý ár azamattyń ortaq jaýapkershiligi ekenin atap ótti.
Іs-sharanyń tájirıbelik bóliminde arnaıy qyzmet ókilderi ózderiniń kásibı daıyndyqtaryn kórsetti. Kınologııalyq qyzmet mamandary qyzmettik ıtterdiń kómegimen tyıym salynǵan zattardy anyqtaý tásilderin tanystyrdy.
Forým aıasynda qatysýshylarǵa ınteraktıvti oıyndar, suraq-jaýap alańdary jáne kontserttik baǵdarlama uıymdastyrylyp, jastardyń belsendi qatysýyna múmkindik jasaldy.
Mamandardyń pikirinshe, mundaı kezdesýler jastardyń boıynda quqyqtyq mádenıet pen qoǵamdyq jaýapkershilikti qalyptastyryp, sybaılas jemqorlyqqa, ınternet-alaıaqtyqqa jáne esirtki qylmysyna qarsy ımmýnıtetti kúsheıtýge yqpal etedi.
Atalǵan forýmdy Ulytaý oblysy Polıtsııa departamenti, Ulytaý oblysy boıynsha ekonomıkalyq tergep-tekserý departamenti, QR Memlekettik qyzmet isteri agenttiginiń oblystyq departamenti jáne «Ulytaý jastary» qoǵamdyq birlestigi birlesip uıymdastyrdy.
