Ulytaý oblysynda 80 oryndyq jańa mektep ashyldy
JEZQAZǴAN. KAZINFORM — Bilim kúni Jańaarqa aýdanynyń Manadyr aýylynda 80 oryndyq jańa mekteptiń saltanatty ashylý rásimi ótti.
Jańa bilim oshaǵy «Zańsyz alynǵan múlikti memleketke qaıtarý týraly» zań aıasynda memleketke qaıtarylǵan qarajat esebinen salyndy.
Zamanaýı mektepte oqýshylardyń sapaly bilim alyp, jan-jaqty damýyna qajetti barlyq jaǵdaı qarastyrylǵan. Bilim oshaǵynda 18 oqý kabıneti, robototehnıka kabıneti, sport zaly, sondaı-aq basketbol jáne fýtbol alańdary bar.
Mekteptiń ashylý saltanatyna Ulytaý oblysynyń ákimi Eset Baıken, oblys Prokýrory Jasulan Elamanov, oblystyq máslıhat tóraǵasy Baýyrjan Shyńǵysov qatysyp, ustazdar men oqýshylardy jańa oqý jylymen quttyqtady.
«Memleket basshysy Qasym-Jomart Kemeluly Toqaevtyń tapsyrmasyna jáne Úkimettiń qoldaýyna sáıkes, Qazaqstan Respýblıkasy Bas prokýratýrasynyń bastamasymen qurylǵan arnaıy memlekettik qor qarajaty esebinen óńirlerde áleýmettik jáne ınfraqurylymdyq nysandar boı kóterýde.
Ulytaý oblysyna atalǵan qordan 20 mlrd teńgeden astam qarajat bólinip, onyń esebinen 17-den astam nysannyń qurylysy júrgizilýde. Onyń 12-sin bıyl jyl sońyna deıin aıaqtap, paıdalanýǵa berý josparlanyp otyr», — dedi oblys ákimi.
Búginde Ulytaý oblysynda 86 mektep jumys isteıdi. Bilim berý uıymdarynda 41 671 oqýshy bilim alýda. Qazirgi ýaqytta óńirdiń barlyq bilim oshaǵy tıisti daıyndyqpen jańa oqý jylynyń jumysyn bastady.
Aıta keteıik, Manadyr stantsııasynda jańa mekteptiń qurylysyn júrgizýge arnaıy memlekettik qordan 1,2 mlrd teńge bólindi.
