Ulytaý oblysynda 45 avtokólik evakýatsııalandy

ASTANA. KAZINFORM — Ulytaý oblysynda aýa raıynyń kúrt ózgerýine baılanysty respýblıkalyq mańyzy bar «Qyzylorda – Jezqazǵan» avtojolynyń qaıta jańǵyrtylyp jatqan 216-424 shaqyrym aralyǵynda kólik qozǵalysy qıyndady. 

— Qar aralas jańbyr jaýyp, aýa temperatýrasynyń +2-den +8°S-qa deıin kenet jylynýy aınalma joldardyń jaǵdaıyna keri áserin tıgizdi. Osyǵan baılanysty atalǵan ýchaskede ýaqytsha qozǵalys shekteýi engizildi.

Qolaısyz aýa raıy saldarynan aınalma joldardyń jamylǵysy shamadan tys ylǵaldanyp, jumsarǵan. Bul júk jáne jeńil kólikterdiń júrýin edáýir qıyndatty, — delingen QazAvtojol habarlamasynda.

Jol qyzmetteri jaǵdaıdy turaqtandyrý úshin jedel sharalar qabyldady. Ýchaskede 5 tıegish pen 2 avtogreıder jumys istep, jol jabynyn qalpyna keltirý jáne sý burý júıeleri keńeıtilip jatyr.

Qabyldanǵan sharalardyń nátıjesinde jolda qalǵan 45 júk jáne jeńil avtokólik evakýatsııalanyp, qaýipsiz jerge jetkizildi. Qazirgi ýaqytta joldy qalypqa keltirý jumystary jalǵasyp jatyr.

Aıta ketelik jol qaýipsizdigi strategııasy ázirlenip jatqany týraly jazǵan edik.