Ulytaý oblysynda 31 jeltoqsan kúni joǵalyp ketken eki er adam tabyldy

JEZQAZǴAN. KAZINFORM — Ulytaý aýdany aýmaǵynda joǵalyp ketken eki er adamdy izdeý-qutqarý jumystary sátti aıaqtaldy.

Tótenshe jaǵdaılar mınıstrliginiń málimetinshe, 31 jeltoqsan kúni kúndiz 1957 jáne 1959 jyly týǵan azamattar «Amantaı» sharýa qojalyǵynan Ulytaý aýdanyna qarasty «Bazyl» qystaǵy baǵytyna traktormen jolǵa shyqqan. Jol barysynda tehnıkanyń otyny taýsylyp, olar jaıaý qozǵalysty ártúrli baǵytta jalǵastyryp, adasyp ketken.

- Іzdeý-qutqarý jumystaryna TJM bólimsheleri, jergilikti atqarýshy organdar men polıtsııa qyzmetiniń kúshteri tartyldy. Operatsııa kezinde arnaıy tehnıka, jeke quram jáne ushqyshsyz ushý apparattary paıdalanyldy, - dep habarlady vedomstvodan.

Alǵashqy azamat 1 qańtar kúni «Jomart» kenishinen batys baǵytta shamamen 7 shaqyrym qashyqtyqta tabyldy. Onyń jaǵdaıy qanaǵattanarlyq dep baǵalanyp, medıtsınalyq kómek qajet bolmaǵan.

Ekinshi er adam 2 qańtar kúni «Jomart» kenishiniń mańyndaǵy geologtarǵa óz betinshe jetken. Keıin qutqarýshylar ony «Bazyl» qystaǵyna jetkizdi. Onyń da jaǵdaıy qanaǵattanarlyq.

Aıta keteıik, Atyraý oblysynda tórt turǵyn izdestirilip jatyr.