Ulytaý oblysynda 30-ǵa jýyq áleýmettik jáne ınfraqurylymdyq nysan jańǵyrtylyp jatyr
ASTANA. KAZINFORM – Ulytaý oblysynda 30-ǵa jýyq iri áleýmettik jáne ınfraqurylymdyq nysandy jańǵyrtý jumystary júrgizilip jatyr. Bul týraly Jezqazǵan qalasynda Memleket basshysynyń Joldaýynda aıqyndalǵan mindetterdi talqylaýǵa arnalǵan kezdesýde aıtyldy.
9 qarashada ótken kezdesýge Quryltaı depýtaty Darhan Ahmedıev, Qazaqstan Halyq Keńesiniń múshesi Amanjol Áltaı jáne Eńbek jáne halyqty áleýmettik qorǵaý vıtse-mınıstri Eldar Kúzenbaev qatysty.
Jıynda Prezıdent Qasym-Jomart Toqaevtyń 2026 jylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Joldaýynda belgilengen basymdyqtar talqylandy.
Atap aıtqanda, tsıfrlyq transformatsııa, jasandy ıntellektini damytý, halyqtyń ál-aýqatyn arttyrý, jumyspen qamtý, áleýmettik ınfraqurylymdy jańǵyrtý jáne adamı kapıtaldy damytý máselelerine nazar aýdaryldy.
– Memleket basshysynyń Joldaýy el damýynyń strategııalyq baǵdarlaryn aıqyndap, ekonomıkany nyǵaıtýǵa, halyqtyń ómir súrý sapasyn arttyrýǵa jáne memlekettik basqarý júıesin jańǵyrtýǵa baǵyttalǵan. Osy bastamalardyń óńirlik deńgeıde júıeli ári nátıjeli júzege asyrylýyn qamtamasyz etý barshamyzdyń ortaq mindetimiz, – dedi Darhan Ahmedıev.
Kezdesýde óńirdiń áleýmettik ınfraqurylymyn keshendi jańǵyrtýǵa arnalǵan «Halyqtyq qurylys» baǵdarlamasyna erekshe nazar aýdaryldy.
Baǵdarlama aıasynda oblysta jańa bilim berý, densaýlyq saqtaý, sport jáne mádenıet nysandaryn salý josparlanyp otyr. Bul áleýmettik qyzmetterdiń qoljetimdiligin arttyrýmen qatar, jańa jumys oryndaryn ashýǵa múmkindik beredi.
Qazirgi ýaqytta Memleket basshysynyń tapsyrmalary men Úkimettiń qoldaýy aıasynda Ulytaý oblysynda 30-ǵa jýyq iri áleýmettik jáne ınfraqurylymdyq nysandy jańǵyrtý jumystary júrgizilýde.
Óńirdiń kólik-logıstıkalyq áleýetin arttyrý baǵytynda da birqatar joba iske asyrylyp jatyr. Negizgi temirjol vokzaldaryn jańǵyrtý jumystary aıaqtalǵan.
Sonymen qatar Jezqazǵandy Qyzylorda, Arqalyq jáne Qaraǵandy qalalarymen baılanystyratyn strategııalyq mańyzy bar avtomobıl joldaryn salý jáne jóndeý jumystary jalǵasyp jatyr.
Bul jobalar kólik qatynasyn jaqsartýǵa, júk jáne jolaýshylar tasymalynyń tıimdiligin arttyrýǵa, sondaı-aq óńirdiń ınvestıtsııalyq tartymdylyǵyn kúsheıtýge baǵyttalǵan.
Budan bólek, oblysta densaýlyq saqtaý, bilim berý jáne sport ınfraqurylymyn damytý boıynsha keshendi jumystar qolǵa alynǵan.
Jobalar bıýdjet qarajaty esebinen, sondaı-aq «Samuryq-Qazyna» AQ, «Qarmet» AQ, «Qazaqmys» korporatsııasy men «Zhyly Zhurek» qorynyń qoldaýymen júzege asyrylyp jatyr.
Josparlanǵan jumystar aıasynda óńirdiń qalalary men aýyldarynda aýrýhanalar, emhanalar, balabaqshalar, ınklıýzıvti jáne ońaltý ortalyqtary, zamanaýı sport keshenderi men Kongress-ortalyǵy salynyp jatyr.
Kezdesý barysynda turǵyndar áleýmettik qoldaý sharalary, medıtsına qyzmetkerleriniń eńbekaqysy, pedagogterdiń ákimshilik júktemesin azaıtý, sondaı-aq óńirdiń ekologııalyq jáne tehnologııalyq máselelerine qatysty saýaldaryn qoıdy.
Sý resýrstaryn tıimdi paıdalaný jáne tsıfrlyq ınfraqurylymdy damytý máseleleri de talqylandy.
Jıyn sońynda spıkerler turǵyndardyń suraqtaryna jaýap berip, kóterilgen máseleler boıynsha túsinikteme berdi.
Aıta keteıik, buǵan deıin Ulytaý oblysynda 25-ten astam iri áleýmettik jáne ınjenerlik-kommýnıkatsııalyq jobany júzege asyrý bastalǵany habarlanǵan bolatyn. Jobalar ulttyq kompanııalar men iri bıznes ókilderiniń qatysýymen kezeń-kezeńimen iske asyrylyp jatyr.
