Ulytaý oblysynda 28 mln teńge bıýdjet qarjysyn jymqyrǵan býhgalterge úkim shyqty
JEZQAZǴAN. KAZINFORM – Jezqazǵan qalalyq soty Sátbaev qalasy bilim bólimine qarasty №2 balalar mýzyka mektebiniń býhgalterin 28 mln teńgeden astam bıýdjet qarajatyn jymqyrǵany úshin kináli dep tapty.
Sot tergeýi barysynda memlekettik aıyptaýshy 2024 jyldan 2025 jylǵa deıingi aralyqta býhgalterdiń ózine zańsyz túrde artyq jalaqy taǵaıyndap kelgenin dáleldedi.
Sonymen qatar ol mekemede is júzinde jumys istemegen adamdarǵa – «óli jandarǵa» eńbekaqy eseptep otyrǵany anyqtaldy.
- Sot úkimimen aıyptalýshyǵa 5 jyl 4 aı merzimge bas bostandyǵynan aıyrý jáne dál osy merzimge býhgalterlik qyzmetpen aınalysý quqyǵynan aıyrý jazasy taǵaıyndaldy, - delingen Bas prokýratýranyń aqparatynda.
Úkim zańdy kúshine engen joq.
Aıta keteıik, elordada býhgalterlik qyzmet atyn jamylyp, alaıaqtyq jasaǵan kúdikti ustaldy.