Ulytaý oblysynda 25 sottalýshy raqymshylyqqa ilikti

ULYTAÝ. KAZINFORM – Qazaqstan Respýblıkasy Konstıtýtsııasynyń 30 jyldyǵyna oraı jarııalanǵan raqymshylyq Ulytaý oblysynda naqty júzege asyryla bastady. Birqatar azamat tolyqtaı bostandyqqa shyqsa, keıbirine jaza merzimin qysqartý túrinde jeńildik berildi. 

Resmı derekterge súıensek, Ulytaý oblysynda raqymshylyq zańyn qoldanýǵa 25 sottalýshy iligip otyr. Olardyń 5-eýi tolyq jazadan bosatylady, al 20 adamnyń jaza merzimi qysqartylady. Bul – sot sheshimimen jáne ár istiń ereksheligin eskere otyryp júrgiziletin protsess. 

Raqymshylyq – izgilendirý sharasy. Ol tek jeńil jáne ortasha aýyrlyqtaǵy qylmys jasaǵandarǵa qatysty qoldanylady. Árbir is jeke tártipte sot arqyly qaralyp, sheshim qabyldanady. Bul avtomatty túrde emes, zań aıasynda, naqty mán-jaılardy eskere otyryp júzege asyrylady.

Búginde Ulytaý oblysynda tórt sottalýshyǵa qatysty materıaldar sotta qaralyp, jaza merzimderi qysqartylǵan. Qalǵan merzimi zań sheńberinde aıaqtalǵan dep tanylyp, olar jazasyn óteý oryndarynan bosatyldy. 

Esterińizge sala keteıik, raqymshylyq týraly zań Qazaqstannyń qylmystyq-saıası baǵytyn izgilendirýge, sottalǵan azamattardy qoǵamǵa beıimdeýge jáne qylmystyq-atqarý júıesiniń júktemesin azaıtýǵa baǵyttalǵan. Bul zań Konstıtýtsııanyń 30 jyldyǵyna oraı qabyldanǵan. Eldiń barlyq óńirinde arnaıy komıssııalar qurylyp, materıaldardy saraptap, sotqa joldaý boıynsha jumys atqaryp jatyr. 

Ulytaý oblysynda da raqymshylyq rásimi jalǵasýda. Aldaǵy aılarda zań talaptaryna sáıkes keletin ózge sottalýshylardyń isteri qaralyp, sheshimder qabyldanady.

Aıta keteıik, buǵan deıin Qaraǵandy oblysynda raqymshylyq 500-den astam sottalǵan adamǵa qatysty qoldanylýy múmkin ekeni habarlanǵan.