Ulytaý oblysynda 14 myńǵa jýyq kıiktiń óleksesi joıyldy

JEZQAZǴAN. KAZINFORM – Ulytaý oblysyndaǵy Mamandandyrylǵan tabıǵat qorǵaý prokýratýrasynyń tapsyrmasyna saı sondaǵy ýákiletti organdar men eriktiler eldi mekenderdi kıikterdiń ólekselerinen tazartyp jatyr. Bul týraly oblystyq prokýratýra málim etti. 

— Qazirgi ýaqytta 14 myńǵa jýyq kıik ólekseleri jınalyp, arnaıy oryndarda joıyldy. Atalǵan is-sharaǵa 145 adam jáne 67 tehnıka jumyldyrylǵan. Keńgir sý qoımasyn ólekselerden tazartý jumystary tótenshe jaǵdaılar organdarynyń qyzmetkerleri jáne arnaıy tehnıkalarymen júrgizilip jatyr, — delingen habarlamada.

Sonymen birge jergilikti turǵyndar da atsalysyp, ózderiniń úlesterin qosyp jatyr. 

Bul baǵyttaǵy jumystar áli de jalǵasatyn bolady. Bul jaǵdaı prokýratýra organdarynyń aıryqsha baqylaýynda.

Eske sala keteıik, buǵan deıin Ekologııa mınıstrligi kıikterdiń qyrylýyna qatysty túsinik bergen bolatyn.