Ulytaý oblysyna tartylǵan ınvestıtsııa kólemi 1,7 paıyzǵa artty
JEZQAZǴAN.KAZINFORM – Bul týraly óńirlik kommýnıkatsııalar alańynda ótken baspasóz brıfıngi barysynda Ulytaý oblysy ákiminiń orynbasary Nurtas Káripbaev málim etti.
Kezdesý barysynda óńirdiń áleýmettik-ekonomıkalyq damýy, ınvestıtsııalyq ahýaly men aldaǵy iri jobalar týraly keńinen baıandaldy.
Belgili bolǵandaı, 2026 jyldyń qańtar–naýryz aılarynda oblysqa tartylǵan ınvestıtsııa kólemi 40,6 mlrd teńgeni qurap, ótken jyldyń sáıkes kezeńimen salystyrǵanda 1,7 esege artqan. Bul kórsetkish óńirdiń ınvestıtsııalyq tartymdylyǵynyń artyp kele jatqanyn aıqyn kórsetedi.
Bıyl oblysta jalpy quny 11,8 mlrd teńgeni quraıtyn, 200-ge jýyq jańa jumys ornyn ashýǵa múmkindik beretin 4 iri jobany iske qosý josparlanǵan.
Sonymen qatar, qazirgi ýaqytta quny 49 mlrd teńgeni quraıtyn iri energetıkalyq joba pysyqtalyp jatyr. PetroKazakhstan kompanııasymen birlesip, energııa saqtaý júıesimen jabdyqtalǵan qýaty 100 MVt jel elektr stantsııasyn salý josparlanǵan. Joba aıasynda 24 jańa jumys orny ashylady.
Ulttyq tsıfrlyq ınvestıtsııalyq platforma aıasynda óńirde jalpy somasy 558 mlrd teńgeni quraıtyn 38 ınvestıtsııalyq joba qalyptastyrylǵan. Atalǵan jobalar 2030 jylǵa deıin kezeń-kezeńimen júzege asyrylady. Nátıjesinde eki myńnan astam jańa jumys orny ashylady degen jospar bar.
Aýyl sharýashylyǵy salasynda da aýqymdy jumystar qolǵa alynǵan. 2026–2027 jyldarǵa arnalǵan jalpy quny 18 mlrd 573 mln teńgeni quraıtyn 12 jobadan turatyn arnaıy pýl jasaqtalǵan.
Brıfıng barysynda Ulytaý oblysynda jumys isteıtin Investorlarǵa qyzmet kórsetý ortalyǵynyń qyzmeti de atap ótildi. Front-ofıs mamandary jergilikti kásipkerlermen jáne sheteldik kompanııalarmen turaqty túrde kezdesýler ótkizip, ınvestıtsııalyq, ındýstrııalyq-ınnovatsııalyq jáne kommertsııalyq baǵyttar boıynsha keńes beredi. Qazirgi tańda jalpy quny 141,3 mln AQSh dollarynan asatyn 5 áleýetti ınvestordyń jobalary súıemeldenip otyr.
Sátbaev qalasynda ındýstrııalyq aımaq qurý jobasy da belsendi júzege asyrylyp jatyr. 2025 jyly bastalǵan joba aıasynda ınjenerlik-kommýnıkatsııalyq ınfraqurylym tartý jumystary júrgizilý ústinde. Bul jumystar 2026 jyldyń maýsym aıynyń sońyna deıin aıaqtalady dep josparlanǵan. Qazirgi tańda ındýstrııalyq aımaqta rezeńke jabyndylar, qurylys materıaldary, moıyntirekter, shynypaketter óndirý jáne qoımalyq ınfraqurylym salalary boıynsha birneshe ınvestor qyzyǵýshylyq tanytqan.
2026 jylǵy 27 naýryzda Qytaı Halyq Respýblıkasynda Ulytaý oblysyn qoldaýǵa baǵyttalǵan jalpy quny 12,5 mlrd teńgeni quraıtyn 6 memorandýmǵa qol qoıyldy. Qujattar turǵyn úı-kommýnaldyq ınfraqurylymdy jańǵyrtý, metallýrgııalyq shlaktardy qaıta óńdeý jáne agroónerkásip keshenin damytý baǵyttaryn qamtıdy. Osy kelisimderdiń nátıjesinde Sıan qalasynda Ulytaý oblysynyń ókildigi ashyldy.
Óńirde turǵyn úı qoryn jańǵyrtý máselesine de erekshe nazar aýdarylyp otyr. Osy maqsatta turǵyn úı qoryn renovatsııalaýdyń jańa biryńǵaı baǵdarlamasy ázirlendi. Taldaý nátıjesinde oblystaǵy 1 545 kópqabatty turǵyn úıdiń 457-si tozyǵy jetken, al 63-i apatty jaǵdaıda ekeni anyqtalǵan.
Sondaı-aq Jezqazǵan qalasynda burynǵy toqyma fabrıkasynyń ǵımaratyn qaıta jańǵyrtý jobasy júzege asyrylý ústinde. Qazirgi tańda ınvestor bekitilgen jobalyq-smetalyq qujattamaǵa sáıkes qurylys-montaj jumystaryn júrgizýde. Nysan úsh bloktan turady. Bolashaqta munda damý ınstıtýttary, qonaqúı, meıramhana, aýmaqtyq uıymdardyń keńseleri, sondaı-aq shaǵyn jáne orta bızneske arnalǵan kommertsııalyq jáne keńse oryndary ornalastyrylady.
