Ulytaý oblysyna Qytaı kompanııalary 400 mln dollarǵa jýyq ınvestıtsııa quıady
JEZQAZǴAN. KAZINFORM — Ulytaý oblysynda ótken «Ulytau Invest–2026» Qazaqstan–Qytaı ınvestıtsııalyq forýmy aıasynda jalpy quny 368,6 mıllıon AQSh dollaryn quraıtyn ınvestıtsııalyq memorandýmdarǵa qol qoıyldy.
Qujattar turǵyn úı qoryn jáne qalalyq ınfraqurylymdy jańǵyrtýǵa, ónerkásipti damytýǵa, shahtalardaǵy óndiristik qaýipsizdikti kúsheıtýge, tómen kómirtekti ındýstrııalyq klaster qalyptastyrýǵa jáne óńirde jel elektr stantsııalaryn salýǵa baǵyttalǵan birqatar ınvestıtsııalyq jobalardy iske asyrýdy kózdeıdi.
Forým Qazaqstan men Qytaıdyń memlekettik organdary, bıznes jáne ınvestıtsııalyq qaýymdastyqtarynyń ókilderin bir alańǵa jınady. Aýqymdy is-sharaǵa Qytaıdyń 20-dan astam iri kompanııasynyń delegatsııalary qatysty.
Іs-sharaǵa deıin Ulytaý oblysynyń ákimi Dastan Ryspekov Shensı provıntsııasynan kelgen delegatsııa basshysy Van Tszıntszınmen ekijaqty kezdesý ótkizip, saýda-ekonomıkalyq yntymaqtastyqty keńeıtý jáne jańa ınvestıtsııalyq jobalardy júzege asyrý máselelerin talqylady.
«Ulytau Invest–2026» forýmy barysynda oblystyń taý-ken metallýrgııasy, óńdeý ónerkásibi, agroónerkásip, energetıka, logıstıka jáne ınfraqurylym salalaryndaǵy ınvestıtsııalyq múmkindikteri tanystyryldy. Sondaı-aq Qazaqstan men Qytaı kásipkerleri arasynda B2B jáne G2B formatyndaǵy kezdesýler uıymdastyrylyp, jańa jobalardy birlesip iske asyrý jáne áriptestikti keńeıtý baǵyttary qarastyryldy.
Іs-sharada sóz sóılegen Ulytaý oblysynyń ákimi Dastan Ryspekov halyqaralyq yntymaqtastyq pen ınvestıtsııa tartý óńir damýynyń negizgi basymdyqtarynyń biri ekenin atap ótti. Onyń aıtýynsha, forým buǵan deıin oblys delegatsııasynyń Qytaıdyń Sıan qalasyna jumys sapary barysynda qol jetkizilgen kelisimderdiń naqty jalǵasy boldy.
Forýmnyń resmı bóliginen keıin Qytaı delegatsııasynyń ókilderi óńirdegi ınvestıtsııalyq alańdar men óndiristik kásiporyndardy aralap, iske asyrylyp jatqan jáne bolashaq ınvestıtsııalyq jobalarmen tanysty.
