Ulytaý oblysy Respýblıka kúnin merekeleýdi sport festıvalimen bastap ketti
Jezqazǵan qalasynda ulttyq sport túrlerinen festıval ótti, dep habarlaıdy Kazinform.
Qala ákimdiginiń baspasóz qyzmetinen málim etkendeı, ulttyq sport túrlerinen alǵash uıymdastyrylǵan jarys Respýblıka kúnine oraılastyryldy. Onda 200-den astam adam sporttyń 8 túrinen baq synady.
«Alǵashqy festıvaldiń maqsaty – tól mádenıetimizdi dáriptep, ulttyq sportty damytý. Ulttyq sport túrleri – tarıhymyzdyń jáne qazaq halqynyń ózindik ereksheliginiń aınasy. Búgingi jarysqa qatysýǵa Ulytaý oblysynan eń myqty sportshylarymyz jınaldy. Jeńiske laıyqtylar jeńedi dep senemiz. Ulttyq sport túrlerinen festıvaldi kelesi jyly qalamyzdyń 70 jyldyq mereıtoıynda respýblıkalyq deńgeıde ótkizý josparlanǵan», – dedi sharany ashqan qala ákimi Qaırat Shaıjanov.
Festıvalde Jezqazǵan, Sátbaev, Qarajal qalalarynan, Jańaarqa, Ulytaý aýdandarynan sportshylar kókpar, asyq atý, toǵyzqumalaq, sadaq atý, aýdaryspaq, teńge ilý, arqan tartys, qazaq kúresinen kúsh baıqasty.
Jarystyń jalpy júlde qory – 6 mln 800 myń teńge.
Qonaqtar men qatysýshylar jergilikti ónerpazdar men arnaıy shaqyrylǵan estrada juldyzy Ushqyn Jamalbektiń ónerin tamashalap, arnaıy tigilgen kıiz úılerde ulttyq taǵamdardan dám tatty.
