Ulytaý oblysy mektepterinde tyıym salynǵan kontentke qoljetimdilik shekteldi
JEZQAZǴAN. KAZINFORM – Ulytaý oblysyndaǵy birqatar bilim berý mekemesinde oqýshylardyń tyıym salynǵan ınternet-resýrstarǵa erkin kire alǵany anyqtaldy, dep habarlaıdy Ulytaý oblysynyń prokýratýrasy.
Júrgizilgen taldaý barysynda «Bilim týraly» Zańnyń 43-baby talaptarynyń qaladaǵy birqatar jalpy bilim berý uıymdarynda óreskel buzylǵany anyqtalǵan.
– Belgilengen normalarǵa qaramastan, 13 mektepte kámeletke tolmaǵandardy olardyń ómiri men densaýlyǵyna qaýip tóndiretin áreketterge, sonyń ishinde sýıtsıd pen zorlyq-zombylyqqa ıtermeleıtin materıaldardy qamtıtyn tyıym salynǵan ınternet-resýrstarǵa erkin qoljetimdilik bolǵan (zańnyń 43-baby, 11-tarmaqshasy) – bilim alýshylardyń, tárbıelenýshilerdiń densaýlyǵy men damýyna zııan keltiretin aqparatqa qoljetimdilikti shekteýge arnalǵan baılanys operatorlarynyń qyzmetteri arqyly ınternetke qoljetimdilikti qamtamasyz etý talaptary), – delingen oblystyq prokýratýra habarlamasynda.
Osylaısha Sátbaev qalasy prokýratýrasynyń qadaǵalaý aktileri boıynsha 13 bilim berý uıymynyń basshylary ákimshilik jaýaptylyqqa tartylyp, ÁQBtK-niń 409-baby, 7-2-tarmaǵyna sáıkes árqaısysyna 10 AEK mólsherinde aıyppul salynǵan.
Sonymen qatar prokýratýra usynýy negizinde atalǵan mekemelerde tyıym salynǵan ınternet-resýrstarǵa qoljetimdilik shekteldi.
Qabyldanǵan sharalardyń nátıjesinde 12 myńnan astam balanyń quqyqtary qorǵaldy.
Aıta keteıik, buǵan deıin Ulytaý oblysynda temir ken ornyn zańsyz satqan kásipker sottalǵanyn jazdyq.
