Ulytaý oblysy qurylys pen ınvestıtsııa kórsetkishi boıynsha elde kósh bastady
JEZQAZǴAN.KAZINFORM - Ulytaý oblysy sońǵy úsh aı qatarynan qurylys jumystary men negizgi kapıtalǵa salynǵan ınvestıtsııa kórsetkishteriniń ósý qarqyny boıynsha respýblıkanyń úzdik óńirleri qatarynan kórindi.
Al sońǵy bes aıdyń qorytyndysy boıynsha óńir atalǵan eki negizgi kórsetkish boıynsha respýblıkada birinshi orynǵa shyqty.
Statıstıkalyq málimetterge sáıkes, oblysta oryndalǵan qurylys jumystarynyń kólemi 87,5 mlrd teńgeni qurap, ótken jyldyń sáıkes kezeńimen salystyrǵanda 3,2 ese artqan. Sonymen qatar negizgi kapıtalǵa salynǵan ınvestıtsııalar kólemi 125,4 mlrd teńgege jetip, 2,5 ese ósti.
Qol jetkizilgen nátıjeler óńir ekonomıkasynyń turaqty damý qarqynyn, ınvestıtsııalyq ahýaldyń jaqsaryp kele jatqanyn jáne júzege asyrylyp jatqan jobalardyń tıimdiligin kórsetedi.
Búginde Ulytaý oblysynda ónerkásip, turǵyn úı qurylysy, ınfraqurylym jáne áleýmettik nysandar salý baǵytynda aýqymdy jobalar júzege asyrylyp jatyr. Bul jumystar óńirdiń áleýmettik-ekonomıkalyq áleýetin arttyryp qana qoımaı, jańa jumys oryndaryn ashýǵa jáne turǵyndardyń ómir súrý sapasyn jaqsartýǵa múmkindik beredi.
