Ulytaý oblysy qurylǵaly beri joldardy eshkim pasporttamaǵan — Antıkor
ASTANA. KAZINFORM — Sybaılas jemqorlyqqa qarsy qyzmet avtomobıl joldaryn salý salasyndaǵy jemqorlyq táýekelderine syrtqy taldaý júrgizýde. Sonyń aıasynda Ulytaý oblysynda jol jóndeý jumysynan eleýli kemshilikter anyqtalǵan.
Ulytaý oblysy joldarynyń jalpy uzyndyǵy — 2711,7 km, oblys qurylǵannan beri jol jóndeýge 30 mlrd teńge jumsalǵan.
Júrgizilip jatqan jumys sheńberinde eleýli jemqorlyq táýekelderi anyqtaldy.
Ulytaý oblysy qurylǵannan beri ákimdikterdiń beıindi bólimderi men basqarmalary joldarǵa pasporttaý júrgizbegen.
Joldardyń jaı-kúıin pasporttaýdyń jáne esepke alýdyń bolmaýy sapasyz josparlaý jáne jóndeý jumystaryn júrgizý qaýpin arttyrady, sondaı-aq jóndeýge jatatyn jol jamylǵysynyń aýdany boıynsha kóterilgen smetalardy bekitýdiń júıeli faktilerine yqpal etedi.
Bul kemshilikter merdigerler men tapsyrys berýshiler úshin tólqujattary bolmaǵan kezde tehnıkalyq qujattamamen aıla-sharǵy jasaýǵa qolaıly jaǵdaı týǵyzady.
JAO Sybaılas jemqorlyqqa qarsy qyzmetiniń usynysy boıynsha joldardy aspaptyq zertteý rásimin josparlaý boıynsha jumys júrgizýde, odan keıin pasporttaý júrgiziledi.
Sátbaev qalasynyń jolaýshylar kóligi jáne avtomobıl joldary bólimi 2024-2025 jyldarǵa arnalǵan aspaptyq tekserý jáne pasporttaý júrgizý boıynsha memlekettik satyp alý sheńberinde shart jasasty.
Pasporttaýdy qoldaný oryndalatyn jumystyń sapasyn arttyrýǵa, kólemderdi, tehnıkalyq jaı-kúıdi jáne ınjenerlik jelilerdi durys anyqtaýǵa múmkindik beredi.
