Ulytaý oblysy azyq-túliktiń 70 paıyzyn ózi óndirýdi kózdep otyr
JAZQAZǴAN. KAZINFORM - Ulytaý oblysynyń ákimi Eset Baıken Ulytaý aýdanyna jumys saparymen baryp, egin jınaý naýqany qarsańynda óńirdiń sharýa qojalyqtary men fermerlerimen kezdesti.
Oblys ákimi aldymen «Beketaı baba» sharýa qojalyǵynyń jumysymen tanysty. Sharýashylyqtyń jalpy jer kólemi 21,3 myń gektardy quraıdy. Onyń 14,8 myń gektary – jaıylym, 5,6 myń gektaryna bıdaı men arpa egilgen. Bıyl sharýashylyqtan 10-14 tsentner ónim alý josparlanyp otyr.
Budan keıin oblys basshysy óńirdegi 20-dan astam sharýa qojalyǵynyń jetekshilerimen kezdesti.
Eset Baıken aýyl sharýashylyǵy men agroónerkásip kesheniniń óńir ekonomıkasyn ártaraptandyrýdaǵy mańyzdy rólin atap ótip, salanyń áleýetin odan ári arttyrý qajettigin aıtty.
Óńir basshysy memlekettik baǵdarlamalar týraly aqparatty sharýalarǵa keńinen ári túsinikti túrde jetkizý qajettigin atap ótti. Sonymen qatar shaǵyn sharýa qojalyqtaryna qoldaý kórsetýdi kúsheıtý, jer ýchaskeleri men memlekettik qoldaý qarajatyn maqsatty ári tıimdi paıdalaný mańyzdy ekenin aıtty.
Sondaı-aq jıynda mal sharýashylyǵy úshin jemshóp bazasyn nyǵaıtý, egin alqaptarynyń ónimdiligin arttyrý jáne aýyl sharýashylyǵy óndirisin damytý máselelerine erekshe nazar aýdaryldy.
Fermerler óz sharýashylyqtarynyń jumysy, kezdesetin máseleler men aldaǵy josparlary týraly baıandady. Sondaı-aq qarjy ınstıtýttary men agrosalaǵa qoldaý kórsetip júrgen kompanııa ókilderi memlekettik baǵdarlamalar men qarjylandyrý múmkindikteri týraly aqparat berip, tájirıbelerimen bólisti.
Oblys ákimi aýyl sharýashylyǵynda tek kólemge emes, eń aldymen ónim sapasyna mán berý qajettigin atap ótti. Onyń aıtýynsha, óńir tutynatyn azyq-túliktiń 60–70 paıyzyn óz óndirisi esebinen qamtamasyz etýge umtylýy kerek.
