Ulytaý oblysy ákimdigi men «Qazaqstan halqyna» qory memorandýmǵa qol qoıdy
JEZQAZǴAN. KAZINFORM — Ulytaý oblysynyń ákimdigi men «Qazaqstan halqyna» qoǵamdyq qory ózara yntymaqtastyq týraly memorandýmǵa qol qoıdy.
Qujat aıasynda óńirde áleýmettik mańyzy bar jobalardy júzege asyrý josparlanyp otyr. Oblys ákimdigi men qoǵamdyq qor bilim berý, densaýlyq saqtaý, mádenıet jáne sport salalarynda áleýmettik ınfraqurylymdy damytýǵa, turǵyndarǵa qaıyrymdylyq kómek kórsetýge jáne jańa jobalardy qarjylandyrýǵa baǵyttalǵan sharalardy birlesip atqarady.
Yntymaqtastyqtyń basym baǵyttary — óńirdiń áleýmettik damýyna oń yqpal etý, bilim, mádenıet jáne sport salalaryndaǵy áleýetti qaıyrymdylyq jobalardy qarastyryp, júzege asýyna qoldaý kórsetý.
Turǵyndardyń rýhanı, tanymdyq jáne ózge de gýmanıstik qajettilikterin qalyptastyrý jáne qanaǵattandyrý úshin oblys ákimdigi qoǵamdyq densaýlyq, bilim, ǵylym, mádenıet, óner, aǵartý salalaryndaǵy qaıyrymdylyq jobalary boıynsha bastamalar usynýdy jáne uıymdastyrýshylyq qoldaýdy qamtamasyz etse, Qor olardy qarastyryp, jobalardy iske asyrýǵa atsalysady.