Ulytaý men Qyzylorda arasyndaǵy jol bıyl tolyǵymen aıaqtalady
ASTANA. KAZINFORM – Qazaqstanda jol ınfraqurylymyn aýqymdy jańǵyrtý aıasynda bıyl birqatar iri jobalar iske asyrylady. Parlament Májilisinde Premer-mınıstrdiń birinshi orynbasary Nurlybek Nálibaev bıyl Ulytaý men Qyzylorda arasyndaǵy jol tolyq aıaqtalatynyn málimdedi.
– Shynynda da, ótken jyldyń sońynda «Qyzylorda – Jezqazǵan» avtojolynyń 216 shaqyrymynyń qurylysy aıaqtaldy. Bıyl Ulytaý men Qyzylorda arasyndaǵy joldy tolyq aıaqtap, ony halyq ıgiligine beretin bolamyz. Sonymen qatar «Qaraǵandy – Jezqazǵan» avtojoly – asa mańyzdy jobalardyń biri. Joldyń uzyndyǵy 575 shaqyrym, quny 524 mlrd teńgeni quraıdy. Onyń qurylysyn da osy aıdyń sońyna deıin bastaımyz jáne aldaǵy eki jyl ishinde sapaly túrde aıaqtaımyz, - dedi Nurlybek Nálibaev.
Jalpy elimiz boıynsha bıyl 11 myń shaqyrymnan astam jol kúrdeli, ortasha jóndeýmen jáne qaıta jańartýmen qamtylǵan. Sondaı-aq jumystar jańa kópirler salý men abattandyrýdy qosa alǵanda, oblystyq jáne aýdandyq mańyzy bar joldarda da júrgizilýde.
Aldaǵy jobalardyń qatarynda uzyndyǵy 765 shaqyrym, quny 725 mlrd teńge bolatyn «Beıneý – Sekseýil» jolynyń qurylysy bar. Sonymen qatar «Batys Eýropa – Batys Qytaı» halyqaralyq kólik dálizin jańǵyrtý sheńberinde «Aqtóbe-Qyzylorda» ýchaskesi ekinshi sanattan birinshi sanatqa aýystyrylady. Bul jumystardy bıyl bastaý josparlanyp otyr.
Odan bólek, Jańaózennen Túrikmenstanmen shekaraǵa deıingi joldy jańǵyrtý jáne jol ınfraqurylymynyń basqa da mańyzdy obektilerin aıaqtaý jalǵastyrylmaq.
Budan buryn habarlaǵanymyzdaı, Úkimet Torǵaı óńirindegi áleýmettik-ekonomıkalyq jobalardy iske asyrýǵa basymdyq berdi.
