Ulytaý-Qyzylorda tasjoly qurylysynyń sozylyp ketýine ne sebep boldy
ASTANA. KAZINFORM — Bul týraly Ulytaý oblysynyń burynǵy ákimi Berik Ábdiǵalıuly Jibek Joly telearnasyna bergen suqbatynda málimdedi.
Berik Ábdiǵalıulynyń aıtýynsha, bul máseleniń birneshe sebebi bar. Birinshiden, joldy salý úshin tender Ulytaý jeke oblys bolǵanǵa deıin oınatylǵan. Ekinshiden, geosaıası jaǵdaıǵa baılanysty qurylys materıaldarynyń baǵasy qymbattap, shyǵyn kólemi shamamen 65 mlrd teńgege ósken.
— Bul tasjoldyń Qyzylorda jaǵyn Eýropalyq qaıta qurý jáne damý banki, al Ulytaý jaǵyn Azııa damý banki nesıe berý arqyly qarjylandyrý kerek-tin. Eýropa damý banki aqshany erterek berip, kórshi aımaq jumysty erte bastap ketti. Geosaıası jaǵdaıǵa jáne baǵanyń kúrt ósýine baılanysty Ulytaý jaǵynda jumys júrgizetin qytaılyq merdiger jol salýdan resmı túrde bas tartty. Sebebi, tıimsiz, shyǵyn kóp. Ulytaý óńiri — qumdy aımaq. Jolǵa tóseletin tasty Jańaqorǵannan jetkizedi. Bul kóp qarjyny talap etedi, — dedi Berik Ábdiǵalıuly.
Al bankten alynatyn nesıe máselesi sozylyp ketken.
— Azııa damý banki 65 mlrd qarjyny bekitpeı otyrdy. Byltyr Úkimettiń atsalysýymen bul másele sheshildi. Tamyz-qyrkúıek aılarynda qujattar daıyn bolyp konkýrs ótti. Jumys bıyl bastalyp ketti, — dedi Berik Ábdiǵalıuly
Aıta keteıik, osy jyldyń basynda Kólik mınıstri Marat Qarabaev tolyq jumys 2027 jyly aıaqtalatynyn málimdegen. Sondaı-aq Ulytaýdan Arqalyqqa aparatyn tasjoldyń qurylysy keler jyly aıaqtalýy tıis. Al Qaraǵandymen aradaǵy tasjoldy jóndeý úshin ketetin shyǵyndy mamandar qazir eseptep jatyr. Bul jobany qarjylandyrý úshin Álemdik bankpen kelissóz bastaldy. Eger bank qarjy bólýge kelisse, 2027 jyldan bastap eki jolaqty jańa jol salynbaq.
Sondaı-aq spıker sheteldegi qazaq jádigerleriniń katalogi jasalatynyn málim etti.