«Ulytaý baspana»: Ulytaý oblysynda jańa turǵyn úı baǵdarlamasy iske qosylady
JEZQAZǴAN. KAZINFORM — Ulytaý oblysynyń ákimdigi men «Otbasy bank» jyl saıyn turǵyn úı baǵdarlamalaryn qarjylandyrýǵa 3 mlrd teńgeden baǵyttaıdy. Búgin Respýblıka kúni qarsańynda oblys ákimi Eset Baıken men «Otbasy bank» basqarma tóraıymy Lázzat Ibragımova 2027–2029 jyldarǵa arnalǵan yntymaqtastyq týraly memorandýmǵa qol qoıdy.
Jańa «Ulytaý baspana» óńirlik baǵdarlamasy aıasynda bastapqy jarnasy 10%-dan bastalatyn, jyldyq syıaqy mólsherlemesi 5% bolatyn turǵyn úı zaemdaryn berý josparlanyp otyr. Qarjynyń 2,5 mlrd teńgesin jyl saıyn «Otbasy bank», al 500 mln teńgesin oblys ákimdigi bóledi.
Oblys ákimi Eset Baıkenniń aıtýynsha, baǵdarlama turǵyn úı qoryn jańartýǵa, baspana kezegin qysqartýǵa jáne óńir turǵyndarynyń jeke baspana alý múmkindigin keńeıtýge baǵyttalǵan.
– Otbasy bankpen birlesken jumysty jańa deńgeıge kóterip, óńir turǵyndary úshin qosymsha múmkindikter ashýdy kózdep otyrmyz. «Ulytaý baspana» baǵdarlamasynyń ereksheligi – ony júzege asyrýǵa iri jáne orta bıznes ókilderi de qatysyp, óz qyzmetkerleriniń turǵyn úı jaǵdaıyn jaqsartýǵa úles qosa alady. Qazirdiń ózinde alǵashqy áleýetti seriktester jobany qoldaýǵa daıyn ekenin bildirdi. Biz úshin jumysshy mamandyqtarynyń ókilderine, áleýmettik sala qyzmetkerlerine jáne óndiris oryndarynyń mamandaryna baspana alýǵa múmkindik jasaý mańyzdy. Adamdardyń týǵan jerinde qalyp, eńbek etip, otbasyn quryp, bolashaǵyn Ulytaý óńirimen baılanystyrýy úshin qajetti jaǵdaı jasaýymyz kerek, – dedi Eset Baıken.
Óńirde birlesken turǵyn úı baǵdarlamalaryn júzege asyrý tájirıbesi bar. Úsh jyl ishinde «Ulytaý jastary» baǵdarlamasy boıynsha 137 jas baspanaly boldy. Al 2025 jyly iske qosylǵan «Sátbaev jumysker» jobasy aıasynda Sátbaev qalasynyń 15 turǵyny páter aldy. Atalǵan baǵdarlamalarǵa bólingen qarjynyń jalpy kólemi 2,6 mlrd teńgeni qurady.
Budan bólek, «Otbasy banktiń» qoldaýymen turǵyn úıge muqtaj azamattar esebinde turǵan 429 adam baspanamen qamtyldy.
Búgin Respýblıka kúni qarsańynda Jezqazǵan jáne Sátbaev qalalarynyń turǵyndary da jańa páterlerdiń kiltin aldy. Oblys ákimi Eset Baıken men «Otbasy bank» basqarma tóraıymy Lázzat Ibragımova jańa qonys ıelerin qýanyshymen quttyqtap, shańyraqtaryna baq-bereke, qut-yrys pen otbasylyq baqyt tiledi.
Oblys ákimdigi málimetinshe, «Ulytaý baspana» baǵdarlamasynyń iske qosylýy turǵyn úıge qoldaý kórsetý tetikterin keńeıtip, óńirdegi jumysshylardy baspanamen qamtýǵa bıznesti tartýǵa múmkindik beredi.
