Ulystyń uly kúni: Elorda men Almatyda balalarǵa arnalǵan qandaı qyzyqtar bar
ASTANA. KAZINFORM – Qazaqstanda Naýryz meıramyna oraı bes kúndik merekelik demalys bastaldy. Bıylǵy meıram 21-25 naýryz aralyǵyn qamtyp, turǵyndar men qala qonaqtaryna kóptegen mádenı, oıyn-saýyq jáne otbasylyq sharalar uıymdastyrylǵan.
Merekelik baǵdarlamanyń basym bóligi Astana men Almatyǵa tıesili. Qos qala da bıyl otbasylyq demalystarǵa arnalǵan júzdegen is-shara josparlanǵan.
Astananyń «Naýryznama» onkúndigi qalaı ótpek?
Elordada bıylǵy mereke «Naýryznama» onkúndigi formatynda ótip jatyr. 14-23 naýryz aralyǵynda qalada 200-den astam is-shara – kontsertter, jármeńkeler, kórmeler men alańdardaǵy merekelik jıyndar uıymdastyrylǵan. Munda ár kún jeke taqyrypqa, ıaǵnı salt-dástúrge, mádenıetke, qaıyrymdylyq pen otbasylyq qundylyqtarǵa arnalǵan.
Uıymdastyrýshylar zamanaýı trendterdi de nazardan tys qaldyrmady. Qala turǵyndaryna, ásirese balalar men jasóspirimder úshin qyzyqty AI-fotostýdııalar men tsıfrlyq alańdar sııaqty ınteraktıvti aımaqtar jumys isteıdi.
Alańdardaǵy merekelik is-sharalar men oıyn-saýyqtar negizinen EXPO aýmaǵy men «Báıterek» monýmentiniń mańy, qala alańdary men «Atatúrik» saıabaǵy, sondaı-aq, aýdandyq skverlerde shoǵyrlanǵan.
– Qalanyń barlyq aýdanynda kıiz úıler tigilip, sahnalar men ınteraktıvti aımaqtar qurylǵan. Qonaqtardy kontserttik baǵdarlamalar, asyq atý, qazaq kúresi, arqan tartys ulttyq oıyndary men qolóner sheberleriniń jármeńkesi kútedi. Ortalyq alańdardaǵy bul sharalardyń barlyǵy tegin, - dep atap ótti uıymdastyrýshylar.
Kishkentaı kórermender úshin merekeniń jóni bólek. Máselen 20 naýryzda «Qazaqstan» jeńil atletıka kesheninde Ulttyq sport túrleri kúnine arnalǵan «Uly Dala Oıyndary» otbasylyq festıvali ótti. Al Ál-Farabı atyndaǵy Oqýshylar saraıynda halyq ertegileri jelisimen «NAURYZ-2026» teatrlandyrylǵan qoıylymy usynylsa, 21 naýryzda elordalyq tsırk óz ónerin kórsetti.
Qandaı teatr, kontsert jáne shoýlar ótedi?
Jabyq ǵımarattaǵy demalysty jón kóretinder úshin teatrlar men kontsert zaldary da bar. Balalarǵa arnalǵan spektaklder men mıýzıklder orta eseppen 2000 – 6000 teńge, tsırk jáne shoý-baǵdarlamalar 3000 – 8000 teńge, kontsertter men otbasylyq keshter 3000 – 10 000 teńge aralyǵynda.
Sonymen qatar EXPO aýmaǵynda 23 naýryzǵa deıin «Naýryz bazary» shyǵys jármeńkesi jumys isteıdi. Munda ulttyq kıimder men sývenırlerden bólek, balalarmen birge serýen jasaýǵa bolady.
Dástúrli merekeden bólek, bıyl túrli jobalar men kreatıvti festıvalderdiń de tynysy keń. Sonyń biri áýezdi áýen, dámdi as pen qyzyqty oıyndardyń basyn qosqan Garage Fest.
Mundaı zamanaýı formatty jany súıetinder úshin taptyrmas orynda erekshe fotozonalar men búkil otbasymen qatysýǵa bolatyn oıyndar uıymdastyrylǵan.
Qalalyq aýqymdaǵy sharalardan bólek, astanalyq kafeler men balalar ortalyqtary da merekege erekshe daıyndyqpen kirisken. Kishkentaı qonaqtar úshin sýret salý jáne músindeý, aspazdyq óneri, sándik-qoldanbaly óner boıynsha arnaıy sheberlik saǵattary ótkiziledi.
– Mundaı sharalardyń kestesi men qatysý sharttary týraly málimetti ár mekemeniń áleýmettik jelidegi paraqshalarynan bilýge bolady, - dep tolyqtyrdy uıymdastyrýshylar.
Bıyl elordada tańdaý múmkindigi mol. Biri ortalyqtaǵy dúbirli dýmandy qalasa, endi biri jyly ǵımarattaǵy teatr qoıylymdaryn tańdaı alady.
Almatydaǵy dástúrli atmosfera men saıabaqtar serýeni
Almatyda da mereke aýqymy keń. Negizgi is-sharalar Abaı jáne Astana alańdarynda, Panfılov kóshesi men Arbatta ótedi. Bul kóshelerde kıiz úıler tigilip, naýryz kóje taratylady.
Balalardy qydyrtý úshin qalanyń saıabaqtary kóptegen sharalar uıymdastarǵan. Mysaly Tuńǵysh Prezıdent saıabaǵy men qalalyq skverlerde merekelik baǵdarlamalar men qosa aýdandyq saıabaqtar bar. Munda adam kóp emes, sondyqtan kishkentaı balalarmen erkin serýendeýge múmkindik bolady. Sondaı-aq qolóner sheberhanalarynda balalar ulttyq buıymdar jasaýdy úırenip, shyǵarmashylyq sheberlik saǵattaryna qatysa alady.
Turǵyndar men qonaqtar merekelik baǵdarlamany tańdaǵanda óz qyzyǵýshylyqtaryna qaraı tańdaı alady. Dástúrge qanyqqysy keletinder ortalyq alańdarǵa, al jaılylyqty qalaıtyndar teatrlar men jabyq ortalyqtarǵa barýyna bolady.
Aıta keteıik, buǵan deıin Astanada «Naýryznama» onkúndigi aıasynda 200-den astam aýqymdy is-shara ótetin habarlaǵan bolatynbyz.
