Ulyrıtanııalyq akter Rassel Brend 10 jyl 6 aıǵa sottaldy
ASTANA. KAZINFORM — London soty ulybrıtanııalyq akter ári komık Rassel Brendti 10 jyl 6 aıǵa bas bostandyǵynan aıyrdy. Alqabıler ony zorlaý jáne jynystyq zorlyq-zombylyqtyń úsh deregi boıynsha kináli dep tanydy, dep habarlaıdy Kazinform agenttigi BBC-ge silteme jasap.
Saýtýark koroldik sotyndaǵy otyrysta jábirlenýshilerdiń málimdemeleri tyńdaldy. Olardyń biri sotqa jeke qatysqanymen, sýdıadan basqa eshkim kóre almaıtyndaı perdeniń artynda otyrdy. Qalǵan jábirlenýshilerdiń jaýaptary oqyldy.
Sotqa ózi qatysqan áıel Rassel Brendtiń áreketterinen keıin birneshe apta boıy «eseńgirep, qatty kúızelgenin» aıtty. Al prokýror oqyp bergen taǵy bir jábirlenýshiniń málimdemesinde akterdiń qylmystyq áreketteri onyń ómirine uzaq ýaqyt boıy kesirin tıgizgeni jazylǵan.
Úshinshi jábirlenýshi 2009 jyly Brend zorlaǵannan keıin uıyqtap, tamaq ishý qıynǵa soqqanyn, jumystan ýaqytsha ketip, ata-anasynyń úıinde turýǵa májbúr bolǵanyn jetkizdi.
Ol óz málimdemesinde: «Men kún saıyn saldarymen betpe-bet kezigetin jaramen ómir súrip kelemin», — degen.
Tórtinshi jábirlenýshi Brendtiń jynystyq zorlyq-zombylyǵynan keıin adamdarǵa degen senimin joǵaltqanyn aıtty.
BBC jazýynsha, 5 qarashada Londonnyń Saýtýark aýdanyndaǵy koroldik sottyń alqabıleri 51 jastaǵy Brendti tórt aıyp boıynsha kináli dep tanydy. Onyń ishinde bir zorlaý jáne jynystyq zorlyq-zombylyqtyń úsh deregi bar. Akter taǵylǵan aıyptardyń barlyǵyn joqqa shyǵaryp, kinásiz ekenin aıtyp keledi.
Jalpy, Brendke 1999-2009 jyldar aralyǵynda alty áıelge qatysty jasalǵan jeti qylmys boıynsha aıyp taǵylǵan. Bul kezeńde akter brıtanııalyq shoý-bızneste keńinen tanylyp kele jatqan edi.
Rassel Brendke qatysty sot protsesi 12 qazanda bastaldy. Alqabıler jábirlenýshilerdiń, kýágerlerdiń jáne akterdiń óz jaýaby tyńdady.
28 qazanda boljamdy jábirlenýshiler men kýágerlerden jaýap alynǵannan keıin akterdiń ózi de alqabıler aldynda sóz sóıledi. Ol ózine taǵylǵan aıyptardy «jan dúnıesine aýyr soqqy bolǵan jaǵdaı» dep atap, bul oqıǵalar ómirine «qatty áser etkenin» aıtty. Sondaı-aq jynystyq qatynasqa kelisim berýdi «negizgi qaǵıdat» dep esepteıtinin jetkizdi.
BBC tilshileriniń sot zalynan habarlaýynsha, beısenbi kúni kináli dep taný týraly sheshim jarııalanǵan kezde Brend ornynan qozǵalmaı, eshqandaı emotsııasyz otyrǵan.
Jańa aıyptar
Belgili bolǵandaı, Rassel Brendke qatysty taǵy eki áıeldiń zorlaý týraly málimdemesine baılanysty jańa tergeý bastalǵan.
Jýrnalısterdiń málimetinshe, osy aryzdarǵa baılanysty akterden polıtsııa jaýap alǵan.
Rassel Brendtiń fılmografııasynda «Ushyp ketý» romantıkalyq komedııasy, «Vegastan qashý» komedııalyq fılmi bar. Sondaı-aq ol «Jeksuryn men» jáne «Jeksuryn men 2» mýltfılmderindegi keıipkerlerdi dybystaǵan. Keıingi jyldary akter YouTube arnasyn belsendi júrgizip, túrli qastandyq teorııalaryna arnalǵan vıdeolar jarııalap kelgen.
Eske salaıyq, buǵan deıin Italııada qyz zorlaǵan brazılııalyq fýtbolshy jazasyn týǵan elinde óteıtinin jazǵanbyz.
