Ulymdy urdy: Lıftide balany pyshaqtaǵan jasóspirimniń anasy polıtsııaǵa shaǵymdandy
ASTANA. KAZINFORM – Elordada lıftide 5 jasar balany betinen pyshaqtaǵan jasóspirim qazir psıhıkalyq densaýlyq ortalyǵynda jatyr. Áleýmettik jelide jasóspirimdi urdy degen aqparat tarady. Іstiń mán-jaıyn quzyrly mekemelerden bilgen edik.
Jasóspirimniń qazirgi jaǵdaıy týraly Astana qalasynyń psıhıkalyq densaýlyq ortalyǵy dırektorynyń orynbasary, dáriger-psıhıatr Almagúl Aıtjanova aıtyp berdi.
- Ulym dene jaraqatyn aldy degen jasóspirimniń anasynyń ótinishi boıynsha aýrýhanaǵa polıtsııa qyzmetkeri keldi. Tártip saqshysy bólimsheniń kezekshi dárigeri men medbıkeniń qatysýymen áńgimelesý jáne patsıentti tekserýden ótkizdi. Patsıenttiń denesi anasynyń qatysýymen jáne onyń kelisimimen foto dálelge túsirildi, - dedi Almagúl Aıtjanova.
Mamannyń málimdeýinshe, jasóspirimniń denesin tekserý kezinde terisi taza, tutas jáne patsıent kórsetken jerlerde gematoma nemese isiný anyqtalmaǵan.
- Jasóspirimniń anasyna polıtsııa qyzmetkerleri men medıtsına qyzmetkerleri jaǵdaıdy túsindirip, dene jaraqaty anyqtalmaǵanyn habarlady. Erteń osy jaıt boıynsha sot-medıtsınalyq saraptama júrgiziledi jáne onyń nátıjesi qosymsha habarlanady, - deıdi psıhıatr.
Sondaı-aq psıhıkalyq densaýlyq saqtaý ortalyǵynyń ókili atalǵan másele qoǵamdyq densaýlyq saqtaý basqarmasynyń baqylaýynda ekenin málim etti.
Elordanyń polıtsııa departamenti balany pyshaqtaǵan jasóspirimniń anasynan aryz túskenin rastady.
- Jasóspirimniń dene jaraqatyn alý faktisi boıynsha tekserý júrip jatyr. Atalǵan fakt Almaty aýdanynyń polıtsııa basqarmasynda tirkeldi, onyń nátıjesi boıynsha sheshim qabyldanady, - delingen polıtsııa departamentiniń habarlamasynda.
Eske sala ketsek, elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan.
Dárigerler zardap shekken balaǵa dereý ota jasap, psıhologııalyq kómek kórsetti.
Qazir balany pyshaqtaǵan jasóspirim psıhıatrııalyq statsıonarda.
Óz kezeginde Densaýlyq saqtaý mınıstriniń orynbasary Erjan Nurlybaev jasóspirimniń ortaǵa beıim jaǵdaıda bolǵanyn aıtty.
Aıta keteıik, lıftide balany pyshaqtaǵan jasóspirimdi jalǵyzbasty ana tárbıelep otyr.
Eske salsaq, elimizde psıhologııalyq qyzmet týraly arnaıy zań ázirlenip jatyr.