Ulyqbek Tumashınov Shyǵys Qazaqstanda týrızmdi damytýǵa kedergi keltiretin máselelerdi atady
ASTANA. KAZINFORM — Shyǵys Qazaqstan oblysynda taý shańǵysy týrızmin damytýǵa erekshe kóńil bólý qajet. Bul týraly búgin Májilistiń jalpy otyrysynda Premer-mınıstr Oljas Bektenovke saýal joldaǵan depýtat Ulyqbek Tumashınov aıtty.
— Prezıdent Qasym-Jomart Toqaev Qazaqstan halqyna Joldaýynda elimizde týrızmdi damytýǵa erekshe nazar aýdardy. Bul baǵytta Shyǵys Qazaqstan oblysynyń áleýeti joǵary jáne týrızmdi halyqaralyq deńgeıde amytýǵa tolyq múmkindigi bar. Týrızm — jańadan qurylǵan shekaralyq aýdandardyń damýyna, ekonomıkasynyń ósýine, halyqty jumyspen qamtýǵa yqpal etetin strategııalyq sala, — dedi depýtat.
Osy oraıda ol shyǵys óńiriniń tabıǵı erekshelikterine negizdelgen týrıstik marshrýt qalyptasqanyn naqty mysaldarmen keltirdi. Sondaı-aq týrızmniń damýyna kedergi keltirip otyrǵan mynadaı máselelerdi atady:
— ınfraqurylymnyń jetkiliksizdigi (qonaq úı, tamaqtaný, servıs sapasy);
— ekologııalyq táýekelder (qoqys tastaý, órt qaýipsizdigin saqtamaý);
— týrıstik nysandardyń (Katon-Qaraǵaı ulttyq parki, Marqakól qoryǵynyń) saqtalýyn qamtamasyz etý qajettiligi.
— Jergilikti halyq týrızmnen tabys kózi bar ekenin túsinip, saıahatshylarǵa úılerin jalǵa berýde, qosalqy aýylsharýashylyq ónimderin) satyp, qosymsha qarajat tabýda. Bıýdjetke salyq túsimi artýda. Biraq bul jetkiliksiz, — dedi ol.
Májilismenniń aıtýynsha, Prezıdent tapsyrmasyna sáıkes, Zaısan jáne Qaton-Qaraǵaı aýdandarynda jańadan áýejaılar salynyp jatyr. Bul týrıster aǵynyn odan ári arttyrady. Osyǵan baılanysty 2025-2028 jyldarǵa arnalǵan repýblıkalyq bıýdjette jańa áýe baǵyttaryn sýbsıdııalaý máselesin qarastyrý qajet. Sonymen qatar, Zaısan Úrimshi baǵytyn ashý, Marqakól jáne Zaısan aýdandarynda sheteldik týrısterge arnalǵan demalys oryndary men oıyn-saýyq nysandaryn salý qosymsha ınvestıtsııalyq kózderdi tartýǵa múmkindik beredi.
— Almaty taý klasteri jobasymen qatar, Shyǵys Qazaqstan oblysynda taý shańǵysy týrızmin damytýǵa erekshe kóńil bólý qajet. Glýbokoe aýdany men Rıdder qalasynyń geoklımattyq erekshelikteri taý shańǵysy kýrortyn salýǵa óte qolaıly. Jobalardy iske asyrý úshin ınjenerlik jáne jol ınfraqurylymyn «Báıterek» UBH» AQ qarjylandyrýmen qamtamasyz etý usynylady. Rıdder taý klasteri strategııalyq mańyzy bar joba retinde jańa jumys oryndaryn ashýǵa, salyq túsimderin arttyrýǵa, halyqaralyq deńgeıdegi keshendi týrıstik ónim qalyptastyrýǵa múmkindik beredi, — dedi depýtat.
Osyǵan oraı Ulyqbek Tumashınov Úkimet basshysynan myna máselelerdi qarastyrýdy surady:
1. Shyǵys Qazaqstan oblysy boıynsha týrıstik baǵyttardy damytýǵa arnalǵan jol kartasyn qabyldaý;
2. 2026-2028 jyldarǵa arnalǵan respýblıkalyq bıýdjetke áýe baǵyttaryn sýbsıdııalaý máselesin engizý;
3. Zaısan-Úrimshi baǵytyn ashý múmkindigin zerdeleý;
4. Marqakól men Zaısanda sheteldik týrısterge arnalǵan demalys oryndary men oıyn-saýyq nysandaryn salý jónindegi ınvestıtsııalyq jobalardy qoldaý;
5. Glýbokoe aýdany men Rıdder qalasynda taý shańǵysy kýrorttaryn salýdy «Báıterek» UBH» AQ qarjylandyrýmen qamtamasyz etý.
Jalpy otyrys barysynda májilismen Nurgúl Taýda Premer-mınıstr Oljas Bektenovke saýal joldap, mdıtsınalyq týrızm salasynda biryńǵaı operator qurý qajettigin aıtty.