Ulybrıtanııanyń jańa premer-mınıstri Endı Bernem úkimet quramyn jasaqtaı bastady
ASTANA. KAZINFORM – Ulybrıtanııanyń jańa premer-mınıstri Endı Bernem dúısenbi kúni qyzmetine resmı kirisip, jańa úkimet quramyn jasaqtaı bastady. Qarjy mınıstri bolyp burynǵy qorǵanys mınıstri Djon Hılı, al syrtqy ister mınıstri bolyp Ed Mılıbend taǵaıyndaldy, dep habarlaıdy BBC.
56 jastaǵy Endı Bernem ótken jumada Leıborıstik partııanyń kóshbasshysy bolyp saılanyp, Kır Starmerdiń ornyna kelgen edi. Dúısenbi kúni korol III Charlz ony qabyldap, úkimetti qurýdy resmı túrde tapsyrdy.
Qyzmetine kiriskennen keıin Bernem alǵash bolyp AQSh prezıdenti Donald Tramppen, Ýkraına prezıdenti Vladımır Zelenskıımen jáne Eýropalyq komıssııa tóraǵasy Ýrsýla fon der Lıaıenmen telefon arqyly sóılesti.
Daýnıng-strıttiń málimetinshe, AQSh prezıdentimen áńgime barysynda Bernem Ulybrıtanııanyń qorǵanys pen qaýipsizdik salasyndaǵy mindettemelerine berik ekenin rastaǵan.
Jańa úkimette Qarjy mınıstrligine Djon Hılı taǵaıyndaldy. Ol osy jyldyń maýsym aıynda qorǵanys salasyn jetkilikti qarjylandyrmaǵany úshin úkimetti synǵa alyp, Qorǵanys mınıstri qyzmetinen ketken bolatyn.
Syrtqy ister mınıstri qyzmetine Leıborıstik partııanyń burynǵy jetekshisi Ed Mılıbend keldi. Kır Starmer úkimetinde ol Energetıka jáne kómirtek beıtaraptyǵy mınıstri bolǵan.
Burynǵy syrtqy ister mınıstri Ivett Kýper Densaýlyq saqtaý mınıstri bolyp taǵaıyndalsa, Іshki ister mınıstri Shabana Mahmýd óz qyzmetinde qaldy.
Saıası sarapshylardyń pikirinshe, Mılıbendtiń Syrtqy ister mınıstrligine aýysýy Endı Bernemniń syrtqy saıasatty tájirıbeli saıasatkerge senip tapsyryp, óziniń ishki reformalarǵa kóbirek kóńil bólýdi kózdeıtinin ańǵartady.
Jańa úkimettiń alǵashqy bastamalarynyń qatarynda mindetti memlekettik tsıfrlyq jeke kýálik engizý josparynan bas tartý, Soltústik teńizdegi munaı men gaz óndirý saıasatyn qaıta qaraý, energetıka jáne sý sharýashylyǵy kompanııalaryn memleket baqylaýyna qaıtarý, sondaı-aq mýnıtsıpaldyq turǵyn úı qurylysynyń jańa baǵdarlamasyn iske qosý máseleleri bar.
Sonymen qatar Endı Bernem Shotlandııaǵa, Ýelske, Soltústik Irlandııaǵa jáne Anglııa óńirlerine kóbirek derbestik berý jónindegi ýádesin oryndaýdy kózdep otyr.
Aıta keteıik, Ulybrıtanııanyń premer-mınıstri úkimetiniń basym baǵyttaryn ataǵany habarlanǵan bolatyn.
