Ulybrıtanııanyń turǵyn úı naryǵy: suranys baıaýlap, baǵa tómendep jatyr
ASTANA. KAZINFORM – Ulybrıtanııa boıynsha turǵyn úı baǵalary 6 jeltoqsanǵa deıingi sońǵy tórt aptada qaıtadan tómendedi; salyqqa qatysty alyp-qashpa áńgimeler men suranystyń baıaýlaýy aıasynda jyldyq esepte jyljymaıtyn múlik quny arzandaǵan, dep habarlaıdy Euronews.
Ulybrıtanııada turǵyn úı baǵalary ekinshi aı qatarynan tómendedi. Buǵan naryqta baspananyń kóptigi, jańa salyq salý shemasy jáne qarashada qabyldanǵan memlekettik bıýdjetke baılanysty belgisizdik qysym jasap otyr.
Rightmove derekterine sáıkes, Ulybrıtanııa boıynsha satylymǵa jańadan shyǵarylǵan úılerdiń ortasha suralǵan baǵasy 6 jeltoqsanǵa deıingi tórt aptada 1,8%-ǵa tómendep, £358 138 (€407 972) boldy. Buǵan deıin qarashada da baǵalar taǵy 1,8%-ǵa tómendep, £364 833 (€415 599) deńgeıine túsken edi. Rightmove — Ulybrıtanııa turǵyndary satyp alý nemese jalǵa alý úshin baspana izdeıtin onlaın-platforma.
Jeltoqsan aıyndaǵy bul ádettegiden kúshti tómendeý jyldyq esepte baǵalardyń 0,6%-ǵa arzandaǵanyn bildiredi, bul £2 059 (€2 345) mólsherindegi quldyraýǵa teń.
— Baǵanyń neǵurlym qalypty ósýi satyp alýshylar úshin qoljetimdilikti saqtap, jyl basyndaǵy belsendilikti arttyrdy, tipti Anglııada sáýir aıynda gerbtik alymdy tóleý merzimi aıaqtalǵannan keıin de, — dep túsindirdi Rightmove kompanııasynyń jyljymaıtyn múlik jónindegi sarapshysy Kollın Babkok.
Jyljymaıtyn múlik mámileleri kezinde alynatyn gerbtik alym (Stamp Duty Land Tax, SDLT) — Anglııa men Soltústik Irlandııada belgili bir shekten joǵary quny bar jyljymaıtyn múlik nemese jer satyp alynǵanda tólenetin salyq; ony satyp alǵannan keıin 14 kún ishinde tóleý qajet. Gerbtik alym mólsherlemeleri ádette naýryz aıynyń sońynda ózgertiledi.
— 2025 jyldyń ekinshi jartysynda qarashadaǵy bıýdjette múlikke salynatyn salyqtarǵa yqtımal ózgerister týraly qaýesetterge baılanysty belgisizdik kúsheıe tústi. Mundaı áńgimeler tamyz aıynda-aq paıda bola bastaǵan edi. Bul baǵalar men naryqtaǵy belsendilikke áser etti, sebebi satýshylar qobaljyp otyrǵan satyp alýshylardy tartýǵa tyrysty, — dep qosty Babkok.
Qarashadaǵy bıýdjet bekitilgenge deıin múlik salyǵynyń ósýin kútý naryqtaǵy belsendiliktiń báseńdeýine jáne baǵalardyń tejelýine yqpal etti.
2025 jyldyń birinshi jartysynda naryqqa shyqqan jańa satýshylar sany 2024 jyldyń birinshi jartysymen salystyrǵanda 9%-ǵa joǵary boldy, alaıda osy jyldyń ekinshi jartysynda bul kórsetkish 2024 jylǵy deńgeıden 4%-ǵa tómendedi.
Satyp alýshylar tarapynan suranys jyldyń birinshi jartysynda 2024 jylmen salystyrǵanda 3%-ǵa joǵary bolsa, ekinshi jartysynda 6%-ǵa tómen boldy.
— Soǵan qaramastan, jalpy alǵanda satylymdar úshin jyl anaǵurlym oń nátıje kórsetti: kelisilgen mámileler sany 2024 jylmen salystyrǵanda 3%-ǵa artty, — delingen Rightmove esebinde.
Baǵanyń tómendeýi alǵash ret turǵyn úı satyp alýshylarǵa 2026 jyldyń basynda mámilelerdi rásimdeýge kómektesýi múmkin. Alaıda kelesi jyldyń ekinshi jartysynda bul úrdis ózgerýi yqtımal: Rightmove boljamynsha, jańa satýshylardyń suranys baǵasy 2%-ǵa ósedi.
Qazirgi ýaqytta eki jyldyq tirkelgen ıpotekalyq nesıe boıynsha ortasha mólsherleme 4,33%, bul bir jyl burynǵy 5,08%-ben salystyrǵanda tómen.
Bıýdjet Anglııada quny 2 mln fýnt sterlıngten joǵary turǵyn úıge arnalǵan qymbat jyljymaıtyn múlikke mýnıtsıpaldyq salyqqa ústeme («saraı salyǵy») engizdi. Bul norma 2028 jyldyń sáýir aıynan bastap kúshine enedi.
Ústeme £2 500 (€2 847) mólsherinen bastalyp, quny 5 mln fýnt sterlıng jáne odan joǵary nysandar úshin birtindep £7 500 (€8 543) deńgeıine deıin ósedi.
— Naryqtyq jaǵdaılar belsendiliktiń artýyn qoldap, ekonomıkalyq ahýal neǵurlym aıqyn bola túsedi dep úmittenemiz. Osyǵan baılanysty 2026 jyly baǵa ósimi úshin áldeqaıda jaqsy jyl bolady jáne jyldyń basynda belsendilik qarqyndy jandanady dep boljap otyrmyz, — dep túıindedi Babkok.
Aıta ketelik astanalyqtar 2 aptada úıli bola alatyny týraly jazǵan edik.