Ulybrıtanııanyń Brıstol murajaıynan 600-den astam qundy jádiger urlandy
ASTANA. KAZINFORM — Brıtan polıtsııasynyń málimdemesine sáıkes, qylmystyq reıd kezinde Brıstol murajaıynyń qoımasynan 600-den astam mádenı qundylyq urlanǵany belgili boldy, dep habarlaıdy VVS.
Urlyq 25 qyrkúıekke qaraǵan túni qala ortalyǵyndaǵy Kamberlend-Beısın aımaǵyndaǵy qoımada bolǵan. Brıtan ımperııasy men Dostastyqqa arnalǵan murajaı kollektsııasynan áskerı eskertkishter, zergerlik buıymdar, qazba qaldyqtary men pil súıegi, qola jáne kúmis músinsheler qoldy bolǵan.
Tergeýshiler urlyqtan keıin aımaqtaǵy baqylaý kameralaryna túsip qalǵan 4 er adamnyń fotosýretin jarııalady.
— Mańyzdy mádenı qundylyǵy bar kóptegen zattardyń urlanýy qala úshin eleýli shyǵyn, — dedi Eıvon men Somerset polıtsııasynyń detektıvi Den Býrgan.
Urlanǵan zattardyń arasynda 1600-1873 jyldar aralyǵynda jumys istegen Brıtandyq Ost-Indııa kompanııasyna tıesili áskerı belgiler men erlerge arnalǵan túıreýishter bolǵan. Sondaı-aq zergerlik buıymdar, atap aıtqanda alqalar, bilezikter men saqınalar, oıylǵan músinsheler jáne basqa da sándik zattar, geologııalyq úlgi sııaqty tabıǵatqa qatysty buıymdar bar.
— Jádigerlerdiń deni qaıyrymdylyqqa kelgen. Olar brıtan tarıhynyń kúrdeli kezeńderin túsinýge múmkindik beretin toptamanyń bir bóligi. Biz kinálilerdi jaýapqa tartýǵa jurtshylyq kómektesedi dep úmittenemiz, — deıdi detektıv Býrgan.
Onyń aıtýynsha, polıtsııa qazirdiń ózinde beınebaqylaý kameralarynyń jazbalaryndaǵy mańyzdy tustaryn tekserip, dálelderdi zerttep, zardap shekkendermen únemi baılanys ornatyp otyr.
— Bul artefaktiler Ulybrıtanııa men XVIII ǵasyrdyń aıaǵynan XX ǵasyrdyń aıaǵyna deıin Brıtan ımperııasynyń quramynda bolǵan elder arasyndaǵy baılanysty qujattaıtyn toptamanyń bir bóligi boldy, — dedi Brıstol qalalyq keńesiniń mádenıet jáne shyǵarmashylyq ındýstrııasynyń jetekshisi Fılıp Ýoker.
Brıstol qalalyq keńesiniń ókili urlyq týraly aqparat nege endi taraǵanyn túsindirdi. Bılik qylmystyń aýqymy anyqtalyp, aldyn ala tergeý aıaqtalǵansha aqparat taratpaýdy jón kórgen. Sonymen qatar muraǵat qyzmetkerlerine murajaı qorynda saqtalǵan myńdaǵan zattardy aralap, naqty neniń jetispeıtinin anyqtaý úshin ýaqyt qajet bolǵan.
Aıta keteıik, buǵan deıin Sırııa Ulttyq mýzeıine ury túsip, olar ejelgi músinder men qundy jádigerlerdi úptep ketkenin jazǵan edik.