Ulybrıtanııanyń bolashaq premer-mınıstri úkimetiniń basym baǵyttaryn atady
ASTANA. KAZINFORM — Ulybrıtanııanyń bolashaq premer-mınıstri Endı Bernem qyzmetine kiriser aldynda úkimetiniń negizgi saıası basymdyqtaryn jarııalady, dep habarlaıdy Kazinform agenttiginiń Londondaǵy menshikti tilshisi.
Juma kúni Londonda ótken Leıborıster partııasynyń arnaıy konferentsııasynda Endı Bernem partııanyń jańa kóshbasshysy retinde resmı túrde bekitildi. Ol bul qyzmetke usynylǵan jalǵyz kandıdat boldy jáne depýtattardyń, kásipodaqtardyń, sondaı-aq jergilikti partııa uıymdarynyń keń qoldaýyna ıe boldy.
Alǵashqy baǵdarlamalyq sózinde Bernem biriktirýshi saıası baǵyt arqyly «Ulybrıtanııadaǵy jańa ońshyl kúshterdi jeńýge» nıetti ekenin málimdedi. Onyń aıtýynsha, elge jańa saıasat qajet, al Leıborıster partııasy úshin qazirgi kezeń — ózgerýdiń sońǵy múmkindigi. Bul maqsatqa tek birlesken kúsh-jiger arqyly ǵana qol jetkizýge bolatynyn aıtty.
Sonymen qatar Bernem ózinen burynǵy partııa jetekshisi Kır Starmerdiń eńbegine joǵary baǵa berip, partııany bılikke qaıta ákelgeni úshin alǵys bildirdi. Onyń sózinshe, Starmerdiń basshylyǵymen leıborıster ǵasyrdaǵy eń aýyr jeńilisten keıingi eń iri jeńisterdiń birine qol jetkizdi.
Soǵan qaramastan, jańa kóshbasshy partııa tarıhynyń jańa kezeńin bastaýdy kózdeıtinin jetkizdi. Ol Leıborıster partııasy ishki kelispeýshilikterdi artta qaldyryp, naqty praktıkalyq sheshimderge basymdyq beretinin jáne el aldynda turǵan uzaqmerzimdi syn-qaterlerdi eńserý úshin basqa saıası kúshtermen yntymaqtastyqqa ashyq bolatynyn aıtty.
Bernemniń aıtýynsha, onyń bolashaq úkimeti saıasat uzaq ýaqyt boıy nazardan tys qaldyrǵan mańyzdy máselelerdi batyl sheshýge jáne belgilengen baǵyttan aınymaýǵa nıetti.
Jańa kóshbasshy tolyq baǵdarlamasyn áli jarııalaǵan joq. Degenmen ol úsh negizgi basymdyqty atady:
ókilettikterdiń bir bóligin ortalyq úkimetten óńirlerge berý;
bıznesti qoldaý;
áleýmettik jáne mýnıtsıpaldyq turǵyn úı qurylysyn ulǵaıtý.
Manchester qalasynyń meri retinde uzaq jyldar qyzmet etkeni úshin aıtylǵan synǵa jaýap bergen Bernem ózin tek Anglııanyń soltústiginiń ǵana emes, eldiń barlyq óńiriniń — soltústik, ońtústik, shyǵys, batys, sondaı-aq Shotlandııa, Ýels jáne Soltústik Irlandııa turǵyndarynyń premer-mınıstri bolýǵa nıetti ekenin aıtty.
Bernemniń dúısenbi kúni resmı túrde premer-mınıstr qyzmetine kirisýi kútilýde. Buǵan deıin Kır Starmer Býkıngem saraıyna baryp, bılikti tapsyrý rásimin bastaıdy. Osydan keıin jańa úkimet basshysy Daýnıng-strıttegi rezıdentsııa aldynda halyqqa úndeý jasap, kúnniń ekinshi jartysynda mınıstrler kabınetiniń quramyn jarııalaıdy.
Eske salaıyq, buǵan deıin Ulybrıtanııanyń premer-mınıstri Kır Starmer ózi jetekshilik etken Leıborıster partııasynyń mýnıtsıpaldyq saılaýdaǵy álsiz nátıjelerinen keıin qyzmetinen ketetinin málimdegen bolatyn.
