Ulybrıtanııanyń bes kompanııasy Qazaqstandaǵy ken oryndaryn zerttep jatyr

ASTANA. KAZINFORM – Ulybrıtanııanyń Qazaqstandaǵy Elshiliginiń saýda jáne ınvestıtsııa máseleleri jónindegi dırektory Bet Makkendrık bes birdeı brıtanııalyq kompanııanyń qazaq jerinde geologııalyq zertteý júrgizip jatqanyn aıtty. 

2023 jyldyń naýryzynda Qazaqstan men Ulybrıtanııa sırek mıneraldar salasyndaǵy strategııalyq seriktestik jónindegi ózara túsinistik týraly memorandýmǵa qol qoıǵan bolatyn. Arada bir jyl ótken osy seriktestiktiń jol kartasyna qol qoıyldy.

«Ol kelisimniń úsh negizgi baǵyty bar. Birinshisi ınvestıtsııalyq jobalardy birlesip qaraýdy kózdeıdi. Bul turǵyda elshilik Kazakh Invest kompanııasymen tyǵyz baılanysta jumys istep otyr.

Ekinshi baǵyt – Brıtan geologııalyq qyzmeti Qazaqstannyń ulttyq geologııa qyzmetimen birge geologııalyq derekterdi tsıfrlandyrý baǵytynda jumys istep jatyr. Bul sheteldik ınvestorlardyń mundaǵy resýrstar týraly málimette onlaın formatta ońaı alýyna múmkindik beredi.

Úshinshi baǵyt – bilim berý salasnydaǵy áriptestik. Qazaqstannyń Sátpaev atyndaǵy jáne Shyǵys Qazaqstan tehnıkalyq ýnıversıteti sııaqty taý-ken ónerkásibine baǵyttalǵan ýnıversıtetteri men Ulybrıtanııanyń osy saladaǵy úzdik oqý oryndary paıdaly qazbalar baǵytynda tájirıbe almasyp, ózara akademııalyq baılanys ornatý týraly kelisimge qol qoıady dep josparlanǵan», - dedi ol.

Elshilik ókili osy birlesken jumystardyń arqasynda Qazaqstannyń ınvestıtsııalyq tartymdylyǵy artady dep otyr.

«Bes brıtanııalyq taý-ken kompanııasy zertteý júrgizip jatyr. Derekterdi tsıfrlandyrý arqyly geologııalyq barlaý júrgizetin kompanııalardyń kóbirek kelýine jol ashqymyz keledi. Bir ken ornyn zerttep, barlap, jumysqa qosqanǵa deıin 15-20 jyl ýaqyt ketýi múmkin.

Bizde volfram, ýran, paladıı sııaqty asa mańyzdy sanalatyn paıdaly qazbalardyń tizimi bar. Oǵan qosa búkil álem Qazaqstandaǵy mys pen nıkeldiń, kobalttiń qory týraly biledi», - deıdi Bet Makkendrık.