Ulybrıtanııanyń AQSh-taǵy elshisi Epshteınmen baılanysy úshin qyzmetinen ketti

ASTANA. KAZINFORM — Ulybrıtanııa Syrtqy ister mınıstrligi AQSh-taǵy elshisi Pıter Mandelsonnyń ókilettigin toqtatty, dep habarlaıdy Kazinform agenttiginiń menshikti tilshisi.

— Pıter Mandelson jazǵan elektrondyq hattardaǵy qosymsha aqparatqa baılanysty premer-mınıstr Syrtqy ister mınıstrine ony elshi qyzmetinen bosatýdy tapsyrdy, — delingen Ulybrıtanııa Syrtqy ister mınıstrligi beısenbi kúni taratqan málimdemede.

Elektrondyq hattar Pıter Mandelsonnyń Djeffrı Epshteınmen qarym-qatynasynyń tereńdigin baıqatady.

Áńgime Mandelsonnyń qamaýdaǵy qarjygerge joldaǵan qoldaý hattary jóninde bolyp otyr.

— Jańa aqparat Pıter Mandelsonnyń Djeffrı Epshteınge qatysty alǵashqy úkim ádiletsiz boldy jáne oǵan shaǵymdaný kerek degen usynysyna qatysty. Osyny eskere otyryp jáne Epshteın qylmysynyń qurbandaryn eskere otyryp, onyń elshi retindegi ókilettigi dereý toqtatylady, — dep habarlady Ulybrıtanııa Syrtqy ister mınıstrligi.

Amerıkalyq qarjyger Djeffrı Epshteın, ataqty adamdar men memlekettik qyzmetkerlerdi óziniń jeke aralyna ákelýimen tanymal, kámeletke tolmaǵandardy seksýaldy saýdaǵa salǵany úshin tergeýde boldy. 2019 jyly ol federaldy qamaýda bolǵan kezde óz-ózine qol jumsady. Resmı túrde onyń ólimi óz-ózine qol jumsaý dep tanylǵanymen, Tramptyń keıbir jaqtastary ony kámeletke tolmaǵan qyzdarǵa jynystyq zorlyq-zombylyq jasaǵan yqpaldy adamdardyń esimderin jarııalamas úshin óltirdi dep sanaıdy.

Budan buryn AQSh prezıdenti Donald Tramp The Wall Street Journal basylymyn sotqa beremin dep qorqytyp, Epshteın isiniń keıbir materıaldaryn jarııalaýdy talap etkenin jazǵan edik.