Ulybrıtanııalyq erli-zaıypty Iranda tyńshylyq jasady degen aıyppen qamaýǵa alyndy

ASTANA. KAZINFORM – Qańtar aıynda Irannyń Kerman provıntsııasynda tutqyndalǵan brıtan azamattary Kreıg pen Lındsı Formanǵa tyńshylyq jasady degen aıyp taǵylyp otyr. Bul týraly VVS habarlady.

Málimetterge sáıkes, erli-zaıyptylar mototsıklmen álemdi aralap saıahattap júrip, 30 jeltoqsanda Armenııadan Iranǵa ótken. Olar Iran úkimeti tarapynan tyńshylyq jasady dep aıyptalǵanǵa deıin elde bes kún qalýdy josparlaǵan. Formandar qańtar aıynda Irannyń Kerman qalasynda qamaýǵa alynǵan, biraq ótken aptada ǵana qamaýǵa alynǵany týraly habar tarady.

Eldiń sot júıesiniń ókili Asgar Djahangırdiń aıtýynsha, erli-zaıyptylar «birge saıahattap júrgen 52 jastaǵy erli-zaıyptylar» degen jeleýmen Iranǵa kirip, eldiń kóptegen provıntsııasynda aqparat jınaǵan.

Qamaýǵa alynar aldynda doktorlyq dárejesi bar psıholog Lındsı Forman áleýmettik jelide jańa ómir bastaý úshin Ulybrıtanııadan ketip jatqanyn jazǵan.

– Bul adamdar zertteý jáne saıahattaý syltaýymen Batystyń barlaý qyzmetterine qatysy bar uıymdarmen baılanysta bolǵan. Olardy barlaý agenttikteri qadaǵalap, keıinirek josparlanǵan operatsııanyń bir bóligi retinde tutqynǵa aldy, - deıdi Asgar Djahangır. 

Kerman oblysynyń bas qazysy Hodjat-ýl-Islam ál-Mýslımın Hamıdıdiń aıtýynsha, erli-zaıyptynyń barlaý qyzmetterine qatysty birneshe mekememen baılanysy rastalǵan jáne qosymsha tergeýler jalǵasyp jatyr. 

Aıta keteıik, buǵan deıin Iran bıligi mýzykant áıel bolǵany úshin Isfahan qalasyndaǵy «Lıana» tobynyń kontsertin toqtatqany týraly jazǵan edik.