Ulybrıtanııadan bir jasar Qazaqstan azamaty elge qaıtaryldy

ASTANA. KAZINFORM – Oqý-aǵartý mınıstrligi Balalardyń quqyqtaryn qorǵaý komıteti Ulybrıtanııada dúnıege kelgen bir jasar qyzdyń elge aman-esen oralǵanyn aıtty.

Jaǵdaı jedel áreket etýdi talap etti, sebebi Ulybrıtanııanyń ýákiletti organdary balany brıtandyq otbasynda qaldyrý máselesin qarastyrǵan.

Alaıda qazaqstandyq taraptyń úılestirilgen jáne jedel is-qımylynyń arqasynda balanyń azamattyǵyn jáne týystyq baılanystaryn saqtaý quqyǵy qorǵaldy.

Nátıjesinde qyz bala týǵan ájesimen jáne bıologııalyq ákesimen qaıta qaýyshty.

Mamandardyń týystarymen júrgizilgen profılaktıkalyq jáne túsindirý jumystarynyń barysynda qyzdyń ájesi men ákesi balany óz qamqorlyǵyna alyp, otbasynda tárbıeleýge nıetti ekenderin bildirdi.

— Kishkentaı otandasymyzdy elge qaıtarý úshin Syrtqy ister mınıstrligimen birlese otyryp aýqymdy jumys isteldi. Biz sábıdiń jaqyn týystaryn anyqtap, ony Qazaqstanǵa qaıtarý týraly sheshimge qol jetkizdik. Qazirgi ýaqytta búldirshin óz úıinde, týǵandarynyń janynda, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Sondaı-aq, elge qaıtarý sharalary aıasynda balaǵa qazaqstandyq úlgidegi týý týraly kýálik rásimdeldi. 

Aıta ketelik depýtat sheteldikter úshin «sýrrogat ana» bolýǵa tyıym salýdy usynǵan edi.