Ulybrıtanııadaǵy Saýtend áýejaıynda eki qozǵaltqyshty ushaq apatqa ushyrady

ASTANA. KAZINFORM — London mańyndaǵy Saýtend áýejaıynan ushyp shyqqan shaǵyn ushaq apatqa ushyrady. The Daily Mail basylymynyń málimetinshe, áńgime Nıderlandqa baǵyt alǵan Beechcraft King Air B200 bıznes-djeti týraly bolyp otyr, dep habarlaıdy TASS agenttigi.

Ushaq jergilikti ýaqyt boıynsha 15:45-te ushýy tıis bolǵan, al onyń mejeli baǵyty — Lelıstad qalasy. Qazirgi ýaqytta eki qozǵaltqyshty týrbovıntti ushaqtyń bortynda qansha adam bolǵany belgisiz. Mundaı ushaqtardy ádette 1–2 ushqysh basqarady jáne ol 13 jolaýshyǵa deıin tasymaldaı alady.

Flightradar qyzmetiniń málimetinshe, ushaq kóterile salysymen ushý-qoný jolaǵyna jaqyn mańda bolǵan. The Daily Mail naqtylaǵandaı, ushaq shamamen 200 km/saǵ jyldamdyqpen jerden kóterilip, bar bolǵany 5 metr bıiktikke jetken soń qulaǵan.

Esseks graftyǵynda ornalasqan Saýtend áýejaıynan jeksenbi keshine josparlanǵan tórt reıs toqtatyldy. Al Saýtendke bet alǵan eki ushaq Londonnyń basqa áýejaılaryna — Gatvık pen Stanstedke baǵyttaldy.

Esseks polıtsııasy áýeapattyń bolǵanyn rastady:

— Biz Saýtend áýejaıyndaǵy qaıǵyly oqıǵa ornynda jumys istep jatyrmyz. Shamamen 16:00-de uzyndyǵy 12 metrlik bir ushaqtyń apatqa ushyraǵany týraly habar aldyq, — delingen polıtsııa málimdemesinde. — Qazirgi ýaqytta oqıǵa ornynda barlyq shuǵyl qyzmettermen birlesken jumys júrip jatyr, jáne bul birneshe saǵatqa jalǵasýy múmkin. Osy aımaqty aınalyp ótýge keńes beremiz.

Eske sala keteıik, buǵan deıin AQSh-tyń Kalıfornııa shtatyndaǵy San-Dıego qalasyna jaqyn jerde shaǵyn jeke ushaq apatqa ushyraǵan edi. Oqıǵa saldarynan eki adam qaza taýyp, segiz adam jaraqat alǵan bolatyn.