Ulybrıtanııadaǵy ónerkásip qoımasynda kúshti jarylys boldy

ASTANA. KAZINFORM — Ýıltshır graftyǵynda Sýındondaǵy ónerkásiptik aımaqta ornalasqan qoımada bolǵan kúshti jarylystan keıin kúrdeli tótenshe jaǵdaı ornynda shuǵyl qyzmet jumys istep jatyr, dep habarlaıdy Sky News. 

Ýıltshır polıtsııasynyń habarlaýynsha, jaqyn mańdaǵy aýdandardaǵy adamdar evakýatsııalanyp jatyr. 

Quqyq qorǵaý organdary jergilikti turǵyndardy óz qaýipsizdigi úshin úıde bolyp, terezelerdi jabýǵa jáne aýmaqtan alys júrýge shaqyrdy. 

Órt sóndirý-qutqarý qyzmetiniń málimetinshe, oqıǵa ornynda kemi 10 órt sóndirý mashınasy, onyń ishinde baspaldaq jáne sý tasıtyn kólikter sııaqty mamandandyrylǵan tehnıka jumys istep jatyr. Órt sóndirýshiler qoımadaǵy jalynmen kúresip, órtti aýyzdyqtaýǵa tyrysyp otyr.

Kóptegen jergilikti turǵyn áleýmettik jelide jarylysty sezingenin aıtty. 

Jarylystyń sebebin anyqtaý jumystary júrgizilip jatyr.

Buǵan deıin Madrıdte bardaǵy jarylystan keminde 14 adam zardap shekkenin habarlaǵan bolatynbyz.