Ulybrıtanııadaǵy qýańshylyq ónim kólemin azaıtyp, baǵanyń ósýine ákeldi
ASTANA. KAZINFORM – Ulybrıtanııadaǵy qýańshylyq pen aptap ystyq aýyl sharýashylyǵy óniminiń azaıýyna, kókónis baǵasynyń qymbattaýyna jáne ımporttyń artýyna sebep boldy, dep habarlaıdy TASS agenttigi.
The Guardian basylymynyń málimetinshe, bıylǵy jazdaǵy uzaqqa sozylǵan qýańshylyq pen joǵary temperatýra saldarynan el birqatar aýyl sharýashylyǵy ónimderin ımporttaýǵa májbúr bolyp, ishki naryqtaǵy baǵalar da óse bastaǵan.
Basylymnyń jazýynsha, pabtar, meıramhanalar men sýpermarketter salat pen brokkolıdi Ispanııa men Nıderlandtan satyp ala bastaǵan. Ádette osy kezeńde Ulybrıtanııada bul ónimderdiń mol ónimi jınalýy tıis edi. Alaıda aptap ystyq pen jaýyn-shashynnyń azdyǵy buǵan múmkindik bermegen.
– Qaptamadaǵy salmaqqa jetkizý úshin eki túp brokkolı salýǵa májbúrmiz, – dedi Riviera Produce kompanııasynyń ókili Devıd Sımmons.
Ol Kornýolldaǵy otbasylyq fermada kókónis ósiredi jáne qyryqqabat tuqymdas daqyldar óndirýshileri qaýymdastyǵynyń basqarma múshesi.
Osyǵan baılanysty kóterme naryqta qyzanaq baǵasy 60 paıyzǵa, aısberg salaty 90 paıyzǵa, al kartop 40 paıyzdan astam qymbattady.
Osyǵan oraı 100-den astam kompanııanyń, onyń ishinde eldegi eń iri azyq-túlik bólshek saýda jelileriniń basshylary premer-mınıstr Endı Bernemge ashyq hat joldap, ımportqa táýeldilikti azaıtyp, ulttyq azyq-túlik júıesin nyǵaıtýdy basymdyqqa aınaldyrýǵa shaqyrdy.
29 shildede jazdaǵy tórtinshi aptap ystyq tolqyny aıasynda Anglııa aýmaǵynyń jartysynda qýańshylyq jarııalandy. Ulybrıtanııanyń Qorshaǵan orta, azyq-túlik jáne aýyl sharýashylyǵyn damytý mınıstrliginiń málimetinshe, shildede elde kútilgen jaýyn-shashyn mólsheriniń nebári 7 paıyzy ǵana túsken. Anglııanyń ońtústiginde bul kórsetkish bar bolǵany 1 paıyzdy qurady. Eldiń meteorologııalyq qyzmeti shilde aıyndaǵy aýa temperatýrasy kópjyldyq ortasha kórsetkishten úsh gradýsqa joǵary bolǵanyn habarlady. Kelesi kúni qýańshylyq Ýelste de jarııalandy.
Aıta keteıik, buǵan deıin álemde ekstremaldy aýa raıy qubylystarynyń qaýpi artyp kele jatqanyn jazdyq.
