Ulybrıtanııada jumyssyzdyq deńgeıi 5,2%-ǵa jetti

ASTANA. KAZINFORM – Ulybrıtanııada jumyssyzdyq deńgeıi 5,2%-ǵa deıin ósip, 2020 jylǵy qarasha — 2021 jylǵy qańtar aralyǵyndaǵy úsh aılyq kezeńnen bergi eń joǵary kórsetkishke jetti. 

Bul týraly Ulybrıtanııanyń Ulttyq statıstıka basqarmasy (ONS) 2025 jylǵy qazan–jeltoqsan aılaryn qamtıtyn úsh aılyq kezeńdegi eńbek naryǵynyń jaǵdaıy týraly esebinde málimdedi.

Berilgen derekterge sáıkes, eldegi jumyssyzdyq deńgeıi aldyńǵy toqsanmen salystyrǵanda 0,2 paıyzdyq tarmaqqa artqan.

ONS-tyń ekonomıkalyq statıstıka jónindegi dırektory Lız Makkeon málimetterge bergen túsindirmesinde elde kadr jaldaý belsendiligi álsirep, jumyssyzdyqtyń ósýi baıqalyp otyrǵanyn atap ótti.

Onyń aıtýynsha, osy kezeńde jekemenshik sektordaǵy jalaqy ósiminiń qarqyny baıaýlap, sońǵy bes jyldaǵy eń tómen deńgeıge túsken.

Sonymen qatar memlekettik sektordaǵy jalaqy ósimi de baıaýlaǵanymen, salystyrmaly túrde joǵary deńgeıde qalyp otyr. 

Aıta ketelik Ulybrıtanııada 16 jasqa tolmaǵan balalardyń áleýmettik jelilerge kirýine tyıym salynbaq.