Ulybrıtanııada jumysqa ornalastyramyn dep 10 adamdy aldaǵan astanalyqqa úkim shyqty
ASTANA. KAZINFORM — Astanada TikTok arqyly Ulybrıtanııada jumysqa ornalastyrýdy ýáde etip, azamattardy aldaǵan turǵyn sottaldy. Bul týraly qala prokýratýrasy habarlady.
Vedomstvonyń málimetinshe, elorda turǵyny TikTok áleýmettik jelisinde Ulybrıtanııada jumysqa ornalastyrýǵa kómektesetini týraly jarnama jarııalaǵan.
Áleýmettik jeli arqyly hat almasý kezinde ol ózin shetelge jumysqa jiberetin maman retinde tanystyryp, azamattarǵa keńes bergen. Keıin saýalnamalardy toltyrýǵa baǵyttap, qyzmet aqysy retinde aqsha aýdarýdy suraǵan. Alaıda qarajatty alǵan soń ýádesin oryndamaǵan. Tergeý málimetinshe, ol jábirlenýshilerdiń aqshasyn jeke qajetine jumsaǵan.
Alaıaqtyq saldarynan 10 azamat zardap shegip, keltirilgen materıaldyq shyǵyn kólemi 1 mıllıon teńgeden asty.
Memlekettik aıyptaýdy Astana prokýratýrasy qoldady. Sotta usynylǵan dálelder negizinde sottalýshynyń kinási tolyq dáleldendi.
— Sot onyń kinásin moıyndaǵanyn, jasaǵan isine ókingenin, buryn sottalmaǵanyn jáne keltirilgen materıaldyq shyǵyndy óz erkimen ótegenin eskerip, 3 jyl 6 aı merzimge bas bostandyǵyn shekteý jazasyn taǵaıyndady. Sottalýshyǵa probatsııa qyzmetine eskertpeı turǵylyqty jeri men jumys ornyn ózgertýge, alkogol ónimderi satylatyn oıyn-saýyq oryndaryna (kafe, bar, meıramhana) barýǵa, túngi ýaqytta (22:00-06:00 aralyǵy) úıden tys jerde júrýge tyıym salyndy, — delingen habarlamada.
Sondaı-aq turaqty jumysy nemese oqý orny bolmaǵan jaǵdaıda, jaza merzimi ishinde jyl saıyn 100 saǵat májbúrli eńbekke tartylady.
Astana prokýratýrasy qazaqstandyqtardy shetelde jumys izdeý kezinde saq bolýǵa úndedi. Vedomstvo ókilderi shetelge jumysqa ornalastyrý týraly aqparatty tek resmı derekkózderden, lıtsenzııasy bar kadr agenttikteri men ýákiletti memlekettik organdar arqyly tekserýdi eskertti.
Eske salaıyq, buǵan deıin Astanada Chehııaǵa jumysqa ornalastyramyn dep aldaǵan kúdikti ustalǵanyn habarlaǵanbyz.
