Ulybrıtanııada bos jumys ornynyń jalaqysyn jasyrmaıtyn zań qabyldanbaq
ASTANA. KAZINFORM — Ulybrıtanııada jumys berýshilerdi bos jumys oryndary týraly habarlandyrýlarda usynylatyn jalaqy mólsherin kórsetýge zań júzinde mindetteý josparlanyp otyr. Bul týraly Kazinform agenttigi TASS-qa silteme jasap habarlady.
The Independent gazetiniń málimetinshe, bul bastama týraly Ulybrıtanııa premer-mınıstri Endı Bernem málimdegen.
— Mansap jolyn endi bastadyńyz ba, álde otbasyńyzdy asyraýǵa tyrysyp júrsiz be — jumys izdeýge ýaqyt pen kúsh jumsamas buryn qansha jalaqy alatynyńyzdy bilýińiz kerek. Sondyqtan biz barlyq jumys berýshini usynylatyn jalaqy mólsherin kórsetýge zań júzinde mindetteımiz, — dedi ol.
Úkimet basshysy bıznes ókilderin jastarǵa kásibı tájirıbe jınap, eńbek jolyn bastaýǵa kóbirek múmkindik berýge shaqyrdy.
Eńbek zańnamasyna ózgerister engizýdiń naqty merzimi ázirshe belgisiz. Úkimet ókilderi tıisti sharalardy múmkindiginshe tezirek qabyldaýdy josparlap otyrǵanyn málimdedi.
Bul bastamany Kásipodaqtar kongresiniń bas hatshysy Pol Novak ta qoldady. Onyń aıtýynsha, jumys izdeýshiler bos jumys oryndary týraly habarlandyrýlardan naqty jalaqy mólsheriniń ornyna «básekege qabiletti jalaqy» degen tirkesti jıi kezdestiredi.
Ol úmitkerler uzaq irikteý kezeńderi men suhbattardan ótpeı turyp, usynylǵan jalaqynyń óz talaptaryna saı keletin-kelmeıtinin bilýi kerek ekenin aıtty.
The Independent basylymynyń dereginshe, Ulybrıtanııadaǵy jumys berýshilerdiń tórtten birinen astamy jumysqa qabyldaý týraly habarlandyrýlarda jalaqy mólsherin múlde kórsetpeıdi.
Bul usynys úkimettiń jastar arasyndaǵy jumyssyzdyqpen kúres sharalary jetkiliksiz degen synǵa ushyraǵan tusta aıtyldy. Basylym keltirgen statıstıkalyq málimetterge sáıkes, Ulybrıtanııada 16 men 24 jas aralyǵyndaǵy jastar arasyndaǵy jumyssyzdyq deńgeıi 13 paıyzǵa jetken.
Eske salaıyq, buǵan deıin Germanııada jumyssyzdar sany 3 mıllıonǵa jýyqtaǵanyn jazǵan edik.