Ulybrıtanııada jańa premer-mınıstrdi irikteý bastaldy: Endı Bernem negizgi úmitker
ASTANA. KAZINFORM — Ulybrıtanııada bıleýshi Leıborıster partııasynyń jańa kóshbasshysyn saılaý úderisi bastaldy. Partııanyń jańa jetekshisi qyzmetinen ketetin Kır Starmerdiń ornyna úkimetti basqarady. Bul týraly Kazinform agenttigi TASS-qa silteme jasap habarlady.
Úmitkerlerden ótinim qabyldaý 16 shildege deıin jalǵasady. Saılaýǵa qatysý úshin kandıdat Qaýymdar palatasyndaǵy leıborıst depýtattardyń keminde 20 paıyzynyń, ıaǵnı qazirgi quram boıynsha 81 depýtattyń qoldaýyna ıe bolýy qajet.
Budan bólek, onyń kandıdatýrasyn partııamen baılanysy bar keminde úsh uıym, onyń ishinde eki kásipodaq qoldaýy tıis. Leıborıster partııasynyń kóshbasshysy bolýǵa tek Ulybrıtanııa parlamentiniń qazirgi depýtaty ǵana úmitker bola alady.
Qazirge deıin saılaýǵa qatysýǵa nıet bildirgen jalǵyz kandıdat — Úlken Manchesterdiń burynǵy meri Endı Bernem. Ol 18 maýsymda Qaýymdar palatasynyń depýtaty bolyp saılandy. Endi ol partııanyń basshylyq organdaryna resmı túrde ótinim tapsyrýy kerek.
Eger basqa úmitkerler tirkelmese, Endı Bernem 17 shildede Leıborıster partııasynyń kóshbasshysy atanyp, 20 shildede Ulybrıtanııa koroli III Karlmen kezdeskennen keıin premer-mınıstr qyzmetine kirisýi múmkin.
Brıtandyq buqaralyq aqparat quraldarynyń málimetinshe, Endı Bernem leıborıst depýtattardyń basym bóliginiń qoldaýyna ıe. Sondyqtan ol partııanyń jańa kóshbasshysy bolyp partııaishilik daýys berýsiz-aq saılanýy yqtımal.
Al eger bul qyzmetke basqa kandıdattar da usynylsa, partııa ishinde saılaý ótedi. Leıborıster partııasynyń músheleri men oǵan qarasty uıymdardyń daýys berýi 6–27 tamyz aralyǵynda uıymdastyrylyp, qorytyndysy 29 tamyzda jarııalanady.
Eske salaıyq, 22 maýsymda Kır Starmer Leıborıster partııasynyń kóshbasshysy jáne Ulybrıtanııa premer-mınıstri qyzmetterinen ketetinin málimdegen bolatyn. Eldegi saıası daǵdarys 7 mamyrda ótken jergilikti ózin-ózi basqarý organdarynyń saılaýynan keıin kúsheıdi. Saılaý qorytyndysynda leıborıster alǵash ret Ýels parlamentindegi baqylaýyn joǵaltyp, Anglııadaǵy túrli zań shyǵarýshy organdardaǵy shamamen 1,4 myń mandatynan aıyryldy.
