Ulybrıtanııada jańa áskerı barlaý qyzmeti quryldy
ASTANA. KAZINFORM – Birtutas qurylym qurý barlaý derekterin jınaý men almasý úderisin jedeldetýge baǵyttalǵan, dep habarlaıdy Kazinform menshikti tilshisi.
Ulybrıtanııanyń Qorǵanys mınıstrligi aýqymdy reformanyń bastalǵanyn málimdedi. Onyń aıasynda qurlyq áskerleri, áskerı-teńiz kúshteri, áskerı-áýe kúshteri jáne ǵarysh qolbasshylyǵyna qarasty barlaý bólimsheleri biryńǵaı basqarý ortalyǵyna baǵyndyrylmaq.
Reforma syrtqy qysymnyń kúsheıýi jaǵdaıynda júzege asyrylyp otyr. Bılik ókilderiniń aıtýynsha, ǵaryshtyq júıelerdiń jumysyna kedergi keltirip, jahandyq logıstıkaǵa qaýip tóndiretin kıbershabýyldar kúsheıgen.
Mundaı áreketter brıtandyqtardyń kúndelikti ómirine de áser ete bastaǵan. Atap aıtqanda, taýarlar baǵasynyń ósýine, ekonomıkalyq turaqsyzdyqtyń kúsheıýine, sondaı-aq energetıkalyq qaýipsizdik pen ınfraqurylymǵa tónetin qaterlerdiń artýyna alyp kelip otyr.
Jańa qurylym úshin kadr daıarlaý jańadan qurylǵan Áskerı barlaý akademııasyna júkteldi. Onda kıberbarlaý, ǵaryshtyq zertteýler jáne geokeńistiktik taldaý baǵyttary boıynsha oqý baǵdarlamalary qarastyrylǵan.
Reformanyń taǵy bir bóligi Ulybrıtanııa Qorǵanys mınıstrliginiń ózin qorǵaýǵa qatysty. Vedomstvo janynan qarsy barlaý basqarmasy qurylady. Bul sheshim mınıstrlikke qarsy baǵyttalǵan dushpandyq belsendiliktiń sońǵy bir jylda 50 paıyzdan astamǵa ósýine baılanysty qabyldanǵan.
Jańa barlaý qurylymynyń negizgi elementi Londonnan soltústikke qaraı shamamen 100 shaqyrym jerde ornalasqan Ýaıton áskerı bazasyndaǵy nysan bolmaq. Munda aýmaǵy fýtbol alańymen shamalas barlaý derekterin ıntegratsııalaý ortalyǵy salynǵan. Ortalyqta «Bes kóz» alıansyna múshe elderden keletin málimetterdi qosa alǵanda, túrli aqparattar taldanady. Atalǵan alıans quramyna Aýstralııa, Ulybrıtanııa, Kanada, Jańa Zelandııa jáne AQSh kiredi.
Bul reforma Ulybrıtanııa úkimetiniń ulttyq qaýipsizdikti kúsheıtýge baǵyttalǵan uzaqmerzimdi saıasatyna sáıkes keledi.
Buǵan deıin Ulybrıtanııada áskerı tikushaq óndiretin sońǵy zaýyt jabylýy múmkin ekeni habarlanǵan bolatyn.