Ulybrıtanııada vırtýaldy ájeı telefon alaıaqtarymen kúres júrgizip jatyr
ASTANA. KAZINFORM – Vırtýaldy ájeı telefon alaıaqtarymen uzaq sóılesip, olardyń ýaqyty men resýrstaryn bosqa ketiredi.
Telefon alaıaqtary jeke aqparat pen aqshany urlaý úshin psıhologııalyq aıla-amaldardy qoldanyp, barǵan saıyn jetildirilip keledi. Osy qaýipke jaýap retinde brıtandyq O2 telekommýnıkatsııalyq kompanııasy egde jastaǵy áıeldiń sóılegenin keltirip, qaskúnemderdi ádeıi jańylystyratyn, ýaqytyn bosqa ótkizýge májbúrleıtin «Deızı» atty jasandy ıntellekt jasap shyǵardy.
«Deızı» alaıaqtardyń qońyraýlaryn jyldam taný jáne jaýap berý úshin jasandy ıntellekttiń birneshe modelin biriktirip otyr. Telefon arqyly áńgimelesýdiń joǵary shynaıylyǵynyń arqasynda JI qaskúnemderdi jelide 40 mınýtqa deıin ustaıdy. Qarasha aıynda iske qosylǵannan beri júıe 1000-nan astam kúdikti qońyraýlardy óńdep, alaıaqtar paıdalanatyn negizgi strategııalardy anyqtady.
Telefon alaıaqtyǵynyń negizgi shemalary
«Deızıdiń» jumysyn taldaý qaskúnemder ádette aldyn ala daıyndalǵan stsenarıılerdi paıdalana otyryp, uıymdasqan baılanys ortalyqtarynan áreket etetinin kórsetti. Olar jan-jaqty daıyndyqtan ótken, áleýmettik ınjenerııa ádisterin paıdalanady jáne shabýyldarynyń tıimdiligin arttyrý úshin sátti taktıkalarmen bólisedi.
Keń taralǵan ádisterdiń biri – jeke aqparatty usyný talabymen tanymal taýarlardy tómendetilgen baǵamen satyp alý usynysy. Eger jábirlenýshiniń kúmáni bolsa, alaıaqtar óz strategııasyn tez beıimdeıdi jáne qajet bolǵan jaǵdaıda qysymdy kúsheıtý úshin neǵurlym quzyretti áriptesi – «aǵa menedjer» nemese «sýpervaızermen» sóılestiredi.
Qylmyskerler ózderin kóbinese bankterdiń, iri kompanııalardyń, kýrerlik qyzmetterdiń nemese memlekettik organdardyń qyzmetkerleri retinde tanystyrady. Belgili brendterdi paıdalaný jábirlenýshiniń senimin arttyrady. Senimdi qarym-qatynas ornaǵannan keıin olar psıhologııalyq qysym kórsetý ádisterine kóshedi: banktegi shotty buǵattaý, qarajat joǵaltý, kompıýterdi buzý nemese sottyq qýdalaýmen qorqytady, bul adamdy asyǵys sheshim qabyldaýǵa májbúr etedi.
Telefon alaıaqtaryn qalaı tanýǵa bolady?
Aldaýdyń negizgi ındıkatorlarynyń biri – áńgimelesýshiniń minez-qulqynyń ózgerýi. Bastapqyda alaıaq meıirimdi bolyp kórinedi, biraq áńgime josparǵa saı júrmese, ol ashýshań, tipti agressıvti bolyp ketedi. «Deızıdiń» jumysy qylmyskerler qurbany nusqaýlaryn oryndamasa nemese basqa taqyryptarǵa alańdasa, sabyrlyq joǵaltatynyn kórsetti.
Belgisiz nómirlerden qońyraý shalý, jeke aqparat berýdi suraý, qoqan-loqqy men qysym alaıaqtyqqa tán belgiler ekenin este ustaǵan jón. Basqa adam qanshalyqty senimdi bolyp kóringenimen, árqashan saqtyq tanytý kerek. Kúdik týyndaǵan jaǵdaıda áńgimeni aıaqtap, uıymnyń resmı nómirine habarlasýǵa keńes beriledi.
Aıta keteıik, Ózbekstanda nesıe alaıaqtyǵy bir jylda 42 paıyzǵa ósti.