Ulybrıtanııada velosıped urlyǵy endi qylmys bolyp sanalmaıdy
ASTANA. KAZINFORM — Jańa erejeler temirjol stantsııalary janynda bolatyn velosıped urlyqtarynyń kópshiligin nazardan tys qaldyrady, dep habarlaıdy Kazinform agenttiginiń menshikti tilshisi.
Ulybrıtanııalyq qala mańy turǵyndary kúndelikti poıyz ben metro arqyly jumysqa baryp, stantsııalarda velosıpedterin arnaıy turaqtarǵa qaldyrady. Degenmen, endi olardyń múlkin saqtaý qaýipsizdigine senim azaıdy.
Ulybrıtanııalyq transport polıtsııasy usaq qylmystardy tergeý tásilin ózgertetin jańa erejeler engizdi. Endi temirjol stantsııalary janyndaǵy velosıped urlyqtary, eger kólik eki saǵattan artyq qaraýsyz qaldyrylǵan bolsa, qarastyrylmaıdy, dep habarlaıdy «BBC».
Bul degenimiz, mundaı jaǵdaılardyń kópshiligi nazardan tys qalady jáne beınebaqylaý jazbalary tekserilmeıdi. Synshylar bul saıasat velosıped turaqtaryn qaýipti etip, velosıped urlyǵyn qylmys sanatynan shyǵaryp tastaıtynyn aıtady.
Erejede urlanǵan velosıpedtiń qunyna da erekshe nazar aýdarylǵan: eger onyń quny 200 fýnt sterlıngten (shamamen 150 myń teńge) az bolsa, polıtsııa aryzdy múldem qabyldamaıdy.
Vedomstvo bul ózgerister resýrstardyń jetispeýshiligimen baılanysty ekenin túsindiredi: usaq isterge jáne kamera jazbalaryn qaraýǵa az ýaqyt jumsalsa, patrýldeý men iri qylmystardy tergeýge kóbirek múmkindik paıda bolady.
Jańa tártip basqa jaǵdaılarǵa da qatysty. Mysaly, poıyzdardaǵy urlyqtar tek jolaýshy naqty vagon nómirin kórsetken jaǵdaıda ǵana tergeledi. Al eki saǵattan artyq qaraýsyz qalǵan avtokólikter de polıtsııa nazarynan tys qalady.
Buǵan deıin Ulybrıtanııada urlyq pen tonaý órshidi. Londondy uıaly telefon urlyǵy kóp bolatyn resmı emes astana dep ataıdy, al el álemde eń qymbat saǵattardyń urlyǵynyń úshten bir bóligine ıe. Tek bólshek saýda dúkenderi ótken jyly shamamen 2,8 mıllıard dollar kóleminde shyǵynǵa ushyrady.
Osydan buryn Ulybrıtanııada bıtkoınderdi jylystady degen kúdikke ilingen 47 jastaǵy qytaılyq Chjımıın Tsıan tarıhtaǵy eń iri alaıaqtyq tergeýiniń bóligi aıasynda óz kinásin moıyndaǵany habarlandy.