Ulybrıtanııada sot qyzmetkerleri jalaqynyń azdyǵyna baılanysty ereýilge shyqpaq
ASTANA. KAZINFORM — Ulybrıtanııadaǵy otbasylyq ister jónindegi sottar men probatsııa qyzmetiniń qyzmetkerleri jalaqynyń tómendigi men eńbek jaǵdaıyna narazylyq bildirip, ereýil ótkizedi. Bul týraly BelTA agenttigi habarlady.
— Kásipodaq músheleriniń basym kópshiligi jalaqyny kóterýdi jáne jumys júktemesin azaıtýdy talap etip, ereýil ótkizýge daýys berdi, — delingen uıymnyń málimdemesinde.
Ereýildiń naqty ótetin kúni keıinirek jarııalanady. Sot júıesiniń qyzmetkerleri jalaqyny nebári 5 paıyzǵa kóterý týraly usynysqa jáne jumys berýshiniń eńbek júktemesin azaıtý máselesin talqylaýdan bas tartqanyna narazy.
Kásipodaqtyń málimetinshe, onyń músheleriniń jalaqysy 2010 jyldan beri naqty máninde óspegen. Qazirgi eńbekaqy mólsheri eń tómengi jalaqy deńgeıinen sál ǵana joǵary.
Probatsııa qyzmetiniń qyzmetkerleri de úkimettiń sottalǵandardy merziminen buryn bosatý baǵdarlamasyna baılanysty jumys júktemesiniń artýyna narazylyq bildirip otyr. Bul baǵdarlama túrmelerdegi adam sanyn azaıtý maqsatynda iske qosylǵan.
Buǵan deıin Ispanııada bir táýlikke jalǵasatyn jalpyhalyqtyq ereýil ótetini týraly jazǵan bolatynbyz.
