Ulybrıtanııada patsıentterdiń jasýshalarynan adamnyń shaǵyn aǵzalary ósiriledi
ASTANA. KAZINFORM — Kembrıdj ýnıversıtetiniń ǵalymdary patsıentterdiń jasýshalarynan shaǵyn adam aǵzalaryn — organoıdtardy — ósire bastaıdy. Joba dári-dármekterdi synaý dáldigin arttyryp, medıtsınalyq zertteýlerde janýarlardy paıdalanýdy azaıtýǵa baǵyttalǵan, dep jazady The Guardian.
Ǵalymdar organoıdtardy on jyldan astam ýaqyt boıy ósirip keledi. Zertteýler kórsetkendeı, kólemi bir mıllımetrden aspaıtyn bul shaǵyn tin úlgileri belgili bir aýrýdyń ár adamda qalaı damıtynyn jáne naýqas tinderiniń dári-dármekterge qalaı jaýap beretinin zertteýge múmkindik beredi. Bul dárigerler men zertteýshilerge naqty patsıent úshin eń tıimdi emdi tezirek anyqtaýǵa kómektesýi múmkin.
Zertteýshilerdiń aıtýynsha, janýarlarǵa júrgiziletin dástúrli synaq adam aǵzasynyń dárige áserin árdaıym dál kórsete bermeıdi.
Janýarlarǵa jasalǵan synaqtan sátti ótken preparattardyń 90%-dan astamy keıin adamdarǵa júrgiziletin klınıkalyq synaqtan óte almaı qalady.
Qazirgi ýaqytta AQSh pen Eýropanyń dári-dármekti retteýshi organdary balama ádister qoljetimdi bolǵan jaǵdaıda, solardy paıdalanýdy usynady.
— Adamnyń kóptegen aýrýy janýarlarda múldem kezdespeıdi nemese olarda basqasha ótedi, óıtkeni janýarlar adam emes. Bizge qandaı emdeý ádisteriniń nátıje beretinin jáne qaı patsıentterge sáıkes keletinin kórsete alatyn testter men modelder qajet. Tyshqan bizge muny aıtyp bere almaıdy, — dedi Kembrıdj ýnıversıtetiniń Diń jasýshalary ınstıtýtynyń klınıkalyq pedıatrııalyq gastroenterologııa professory Mattıas Tsılbaýer.
Kembrıdjde £20 mln kóleminde qarjylandyrylatyn arnaıy zertteý ortalyǵy qurylady. Onda ǵalymdar men farmatsevtıkalyq kompanııalar úshin standarttalǵan organoıdtar kitaphanasyn jasaqtaý josparlanǵan.
Bastapqyda zertteýshiler Kron aýrýy men oıyq jaraly kolıtti, sondaı-aq qaterli isikter men nevrologııalyq aýrýlardy zertteýge arnalǵan organoıdtardy jasamaq.
Bul joba Ulybrıtanııanyń ǵylymı zertteýlerde janýarlardy paıdalanýdy azaıtýǵa baǵyttalǵan ulttyq strategııasynyń bir bóligi sanalady. Degenmen ǵalymdar jaqyn bolashaqta janýarlarǵa júrgiziletin synaqtardan tolyqtaı bas tartý ázirge múmkin emes ekenin atap ótti.
Buǵan deıin JI alǵash ret ómir súrýge qabiletti jańa vırýstardy jasap shyǵarǵany habarlanǵan edi.
