Ulybrıtanııada pabtar salyqtyń ósýine narazylyq retinde saıasatkerlerdi kirgizbeı jatyr
ASTANA.KAZINFORM — Ulybrıtanııada bızneske salynatyn salyqtyń kóterilýine qarsy narazylyqtyń erekshe túri keń tarala bastady, dep habarlaıdy Kazinform menshikti tilshisi.
El boıynsha myńnan astam pab bıliktegi Leıborıstik partııadan saılanǵan depýtattardy kirgizbeıtinin málimdedi. Bul qadam qarasha aıynda usynylǵan salyq reformasyna qarsylyq retinde jasalyp otyr.
Narazylyqtyń kópshilikke málim mysaldarynyń biri retinde Anglııanyń Lıds qalasyndaǵy The Marsh Inn pabynyń ıesin keltirýge bolady. Onyń bızneske salynatyn salyǵy 2,5 myń fýnt sterlıngke ósken. Buǵan jaýap retinde ol Qarjy mınıstri Reıchel Rıvz ben onyń áriptesterine pabqa kirýge tyıym saldy.
Bul sheshim ózge de mekeme ıeleri tarapynan qoldaý taýyp, narazylyq jappaı sıpat aldy. Brıtandyq BAQ dereginshe, boıkotqa qazirdiń ózinde myńnan astam pab qosylǵan.
Naýqanǵa tanymal telejúrgizýshi Djeremı Klarkson da qosylyp, óz pabyna depýtattardyń kirýine tyıym saldy. Buǵan deıin ol The Times gazetine bergen suhbatynda Ulybrıtanııadan ketýdi oılap júrgenin aıtyp, elde «salyq, qylmys pen aýrý ǵana ústemdik etetin kezeń bastalyp keledi» dep aıtqan bolatyn.
Narazylyqtyń negizgi sebebi — kommertsııalyq jyljymaıtyn múlikti úsh jyl saıyn qaıta baǵalaý. Bul protsess pabtar men meıramhanalardyń baǵalaý qunynyń qaıta qaralýyna ákelip, sonyń negizinde bıznes salyǵy esepteledi.
Jańa baǵalaýlar 2024 jylǵy kórsetkishterge súıenip jasalady. Al aldyńǵy qaıta baǵalaý 2021 jyly, koronavırýs pandemııasynyń sharyqtaý kezeńinde júrgizilgen edi. Ol kezde qoǵamdyq tamaqtaný oryndarynyń qyzmeti aıtarlyqtaı shektelgen bolatyn.
Sala ókilderi qonaqjaılylyq salasy úshin qosylǵan qun salyǵynyń (QQS) mólsherlemesin tómendetýdi jáne pandemııa kezinde berilgen keıbir salyqtyq jeńildikterdi saqtap qalýdy talap etip otyr. Ásirese COVID-19 kezinde lokdaýn saldarynan kelgen shyǵyndy óteý úshin engizilgen bıznes salyǵy boıynsha 40 paıyzdyq jeńildiktiń joıylýy salyq júktemesiniń kúrt ósýine áser etken basty sebepterdiń biri boldy.
Úkimet standartty salyq júıesine qaıta oralý bıznestiń jaǵdaıyn qıyndatatynyn moıyndap otyr. Osy úderisti jumsartý úshin aldaǵy úsh jylǵa arnalǵan bıýdjette 4,3 mlrd fýnt sterlıng kóleminde qoldaý paketi qarastyrylǵan. Bul qarajat tólemderdiń kúrt ósýin tejeýge jáne ótpeli kezeńdi birqalypty etýge baǵyttalǵan. Mundaı qoldaý bolmaǵanda, kelesi jyly pabtarǵa túsetin salyq júktemesi shamamen 45 paıyzǵa artýy múmkin edi.
Soǵan qaramastan, salalyq uıymdardyń málimetinshe, ýaqytsha qoldaý sharalary eskerilse de, kelesi jyly pabtar úshin ortasha bıznes salyǵy shamamen 15 paıyzǵa ósedi. Bul bir pabqa qosymsha 1,4 myń fýnt sterlıng shyǵyn ákeledi. Al úsh jyl ishinde ortasha bir pabtyń qosymsha shyǵyny 13 myń fýnt sterlıngke jýyqtaýy múmkin.
Ekonomıkalyq narazylyq aıasynda, The Guardian gazetinde jazylǵandaı, parlament depýtattary qoǵamdyq oryndarda jıi dushpandyq kózqarasqa tap bolyp otyr. Ótken jyldyń shildesinde leıborıster bılikke kelgennen keıingi alǵashqy 18 aıda partııanyń reıtıngi shamamen 34 paıyzdan 18 paıyzǵa deıin tómendegen.
Buǵan deıin Ulybrıtanııada turǵyn úı baǵasy qatarynan ekinshi aı tómendep jatqany habarlanǵan edi.
