Ulybrıtanııada oqýshylar sany azaıyp, mektepter jabylý aldynda tur

ASTANA. KAZINFORM — 2030 jylǵa qaraı Anglııada bastaýysh mektep oqýshylarynyń sany 180 myńǵa qysqarady dep boljanyp otyr, dep jazdy Kazinform agenttiginiń menshikti tilshisi.

Eldegi bastaýysh mektepterdegi oqýshylardyń jalpy sany 2018–2019 oqý jylynda shamamen 4,51 mıllıonǵa jetip, eń joǵary kórsetkishke ıe bolǵan. Sodan beri bul kórsetkish shamamen 2%-ǵa azaıǵan, al aldaǵy bes jylda taǵy 4,1%-ǵa tómendeýi múmkin.

Bilim saıasaty ınstıtýtynyń zertteýine sáıkes, bastaýysh synyp oqýshylary sanynyń azaıýy, negizinen, týý deńgeıiniń tómendeýimen baılanysty. Bul kórsetkish 2000 jyldar basyndaǵy «bebı-býmnan» keıin 2012 jyldan beri tómendep keledi.

Másele ásirese Londonda ózekti bolyp otyr. Bul qalada oqýshylar sanynyń azaıýyna astanadan kóship ketýshiler sanynyń artýy jáne ata-analardyń balalaryn memlekettik mektepterden jeke menshik mektepterge aýystyrýy áser etken. 

Oqýshylar sanynyń azaıýy memlekettik mektepter úshin úlken qıyndyq týǵyzyp otyr, sebebi olardyń qarjylandyrý júıesi negizinen «bir oqýshy — bir qarjy» qaǵıdasyna súıenedi. Bıýdjettiń qysqarýy mektepterdiń muǵalimder quramyn ustap qalýyn jáne kúndelikti shyǵyndaryn jabýyn qıyndatady.

Saldarynan oqýshy sany azaıǵan mektepter qarjylyq qysymǵa ushyrap, jabylýǵa májbúr bolýda. Mysaly, tek Londonda sońǵy 5 jylda 23 bastaýysh mektep jabylǵan.

Ulybrıtanııada balalar 5 jastan 11 jasqa deıin bastaýysh mektepte oqıdy, munda olar oqý, jazý, matematıka jáne basqa pánderdiń negizderin meńgeredi. Keıin olar orta mektepke aýysady, bul mektepter jıi bólek ǵımaratta ornalasqan jáne oqýshylar emtıhandar men bolashaq bilimge daıyndyqty sol jerde jalǵastyrady.

Boljam boıynsha, onjyldyq sońyna qaraı bastaýysh mektepterde 4,24 mıllıon oqýshy ǵana qalady, bul 180 myń balaǵa az. The Guardian gazetiniń esebinshe, bul — 800 memlekettik bastaýysh mekteptiń jabylýyna teń kórsetkish.

Jalpy alǵanda, Bilim saıasaty ınstıtýty 2030 jylǵa qaraı Ulybrıtanııada bastaýysh jáne orta mektepterdi qosa alǵanda, memlekettik mektepterdegi oqýshylar sany qazirgimen salystyrǵanda shamamen 400 myńǵa azaıady dep boljaıdy.

Eske sala keteıik, buǵan deıin elimizde daryndy balalardy qoldaýǵa arnalǵan jańa jobalar júzege asyrylatynyn jazǵan edik.